ދައުލަތުން ބޮޑު ޚަރަދެއްކޮށްގެން މާލޭ ސިޓީ ކައުންސިލުން މާލޭގެ މަގުތަކުގައި ހަރުކުރި މަގުތަކުގެ ނަން ބޯޑުތަކުގައި ނަންތައް ނުބައިކޮށް ލިޔެފައި ހުރުމުން ގިނަ ބައެއްގެ ފާޑުކިޔުން އަމާޒުވެއްޖެއެވެ.
ގިނަ މަގުތަކެއްގައި ހަރުކޮށްފައިވާ ނަން ބޯޑްތަކުގައި ލިޔުންތައް ލިޔެފައި ވަނީ ނުބައިކޮށެވެ. “ލޮނުޒިޔާރަތް މަގު” ގައި ހަރުކޮށްފައިވާ ބޯޑްގައި ވަނީ “ލޮނުޒިޔާރައިމަގު” މިފަދައިންނެވެ. އަދި “މާފަތްތަކުރުފާނުމަގު” ގަައި ވާ ބޯޑުގައި ލިޔެފައި އޮތީ “މާފައިތަކުރުފާނުމަގު” މިފަދައިންނެވެ.
މިކަމާ ގުޅިގެން މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ)ގެ ކުރީގެ ސީއީއޯ ޑރ. އަބްދުލްހަންނާން ވަހީދު ވިދާޅުވީ މިއީ “ދިވެހި ބަހަށް ކުރަފިއެރުވުމުގެ” ހުތުރު އަމަލެއް ކަމަށެވެ. ވަގުތުން ވަގުތަށް އެ ނަން ބޯޑުތައް ނެގުމަށް ހަންނާން ވަނީ ގޮވާލާފައެވެ.
މާލޭ ސިޓީ ކަައުންސިލްގައި ތަންދޮރު ދަންނަ މީހުން ނޫޅެނީތޯ ހަންނާން ސުވާލު ކުރެއްވިއެވެ.
ދިވެހިބަހުގެ ލިޔުންތެރިއެއް ކަމަށްވާ އިމާދު ލަތީފް ވެސް ވަނީ އެކަން ކުށްވެރި ކުރައްވާފައެެވެ.
ބައެއް ފަރާތްތަކުން ބުނީ ދިވެހި ބަހާ ބެހޭ މުއައްސަސާއެއް ދައުލަތުގައި ހުރިއިރު، މިފަދަ ކަމެއްކުރާއިރު އެ މުއައްސަސާގެ ބަހެއް ހޯދިފައިނުވުމަކީ ހިތާމަކުރަންޖެހޭ ކަމެއް ކަމަށެވެ.
ކިޔުންތެރިންގެ ހިޔާލު