މެދުއިރުމަތީގައި ހުރި އެމެރިކާގެ އަސްކަރީ ތަންތަނަށް ހަމަލާ ދިނުމަށް ރަޝިޔާއިން އީރާނަށް އެހީވާކަމުގެ ތުހުމަތު އެމެރިކާއިން ކޮށްފިއެވެ.

އެމެރިކާގެ އަސްކަރީ އޮފިޝަލުންނާ ހަވާލާދީ މީޑިއާއިން ބުނެފައިވަނީ، އެމެރިކާގެ އަސްކަރީ ބޭސްތަކަށާއި، ހަނގުރާމައިގެ މަނަވަރުތައް ސީދާ ހުރި ތަންތަނާއި، މަތިންދާ ބޯޓުތައް އުފުލާ މަނަވަރުތައް އަދި އެހެން އަސްކަރީ ވަސީލަތްތައް ހުރި ތަންތަނާބެހޭ ޖާސޫސީ މައުލޫމާތު އީރަށް ފޯރުކޮށްދެނީ ސީދާ ރަޝިޔާއިން ކަމަށެވެ.

ސަބަބެއް ކަމަށް ބުނަނީ، އެމެރިކާއާއި އިސްރާއީލުން އީރާނަށް މިހާރު ދެމުންގެންދާ ވަރުގަދަ ވައިގެ ހަމަލާތަކުގައި އެމެރިކާ ސިފައިން ތިބި ތަންތަން ދެނެގަތުމަށް އީރާނަށް ލިބިފައިވާ ގާބިލްކަން ބަލިކަށި ކޮށްލެވިފައިވާ ކަމަށް ގަބޫލު ކުރުމެވެ.

އެމެރިކާއާއި އިސްރާއީލުން އީރާނަށް ދެމުންގެންދާ ހަމަލާތަކުގައި، އީރާނުގެ ޖާސޫސީ ވަސީލަތްތައް ގާއިމްކޮށްފައިވާ ކަމަށް ބުނާ ތަންތަނަށްވެސް ހަމަލާދީ ހަލާކުކޮށްލަމުން  ގެންދެއެވެ.

އެމެރިކާ ސިފައިން ތިބި ތަންތަނާއި، އެމީހުންގެ މަނަވަރުތަކާއި ހަތިޔާރު ހުރި ތަންތަނުގެ ޖާސޫސީ މައުލޫމާތު ރަޝިޔާއިން ފޯރުކޮށްދޭނަމަ އެއީ ވަރަށް ނުރައްކާތެރި ކަމެއްގެގޮތުގައި އެމެރިކާގެ އަސްކަރީ އޮފިޝަލުން ބުނެއެވެ.

އެމެރިކާގެ އަސްކަރީ އޮފިޝަލުން ރަޝިޔާއަށް ތުހުމަތުތަކެއް މިކުރީ، އީރާނުން މެދުއިރުމަތީގައި ހުރި އެމެރިކާ އަދި އިސްރާއީލުގެ އަސްކަރީ ތަންތަނަށް ސީދާ އަދި ވަރަށް ގެއްލުންދެނިވި ހަމަލާތަކެއް ދޭން ފެށުމާ ގުޅިގެންނެވެ.

އީރާނުގެ ހަމަލާތައް ވަރުގަދަވެފައި އަދި އަމާޒަށް ވާސިލްވެ ބޮޑެތި ގެއްލުންތައް ލިބެމުންދާތީ އެމެރިކާއާއި އިސްރާއީލު ސިފައިންވެސް ސަޕްރައިޒްވެފައިވާ ކަމަށް، މީޑިއާ ރިޕޯޓްތައް ބުނެއެވެ.

އީރާނުން މިއަދުވަނީ ކުވައިތާއި ސައުދީ އަރަބިއްޔާގައި ގާއިމްކޮށްފައިވާ އެމެރިކާގެ އަސްކަރީ ބޭސްތަކަށް ބެލިސްޓިކް މިސައިލާއި ޑްރޯން ބޭނުންކޮށްގެން ވަރަށް ވަރުގަދަ ހަމަލާތަކެއް ދީފައެވެ.

މި ހަމަލާތަކުގައި އެމެރިކާއިން ގާއިމްކޮށްފައިވަ ދުރާލާ އިންޒާރުދޭ ރާޑަރެއްވެސް ގޮއްވައި ހަލާކު ކޮށްލާފައިވާ ކަމަށް ރިޕޯޓްތައް ބުނެއެވެ. މިއީ އީރާނުން ހަމަލާދީ ހަލާކުކޮށްލި އެމެރިކާގެ މިފަދަ ދެވަނަ ރާޑަރެވެ.

އީރާނުގައި ހުރި ދުވަސްވީ “މުސްކުޅި” ހަތިޔާރުތަކުން ދުޝްމަނުންނަށް ހަމަލާދީ ސްޓޮކް ހުސްކޮށްލުމަށްފަހު، ޒަމާނީ ޓެކްނޯލޮޖީގެ ހަތިޔާރުން ހަމަލާތައް މިއަދު ފަށައި، ހަނގުރާމައިގެ މުޅިން އައު ފިޔަވައްސަކަށް ހިޖުރަކުރާނެކަން އީރާނުން ހާމަކޮށްފައިވެސް ވެއެވެ.