ސްރީލަންކާ ކައިރިން ބައިނަލްއަގްވާމީ ކަނޑުގެ ސަރަހައްދުގައި ވަނިކޮށް އީރާނުގެ ކަނޑުގެ ސިފައިންގެ މަނަވަރަށް ހަމަލާދީ ފައްތާލީ އެމެރިކާ ސިފައިންނަށް ހަމަލާ ދިނުމުގެ ނުރައްކާ އޮތުމުން ކަމަށް އެމެރިކާ ސިފައިންގެ ކުރީގެ ޖެނެރަލަކު ބުނެފިއެވެ.

އެމެރިކާ އަސްކަރިއްޔާގެ ކުރީގެ ޖެނެރަލެއް ކަމަށްވާ މާކް ކިމިޓް ބުނީ، އީރާނުގެ މަނަވަރަށް އެމެރިކާއިން ހަމަލާދީ ފައްތާލީ އެއީ ނުރައްކަލެއް ކަމަށް ދެކިގެން ކަމަށެވެ.

ހަނގުރާމައިގެ އުޅަނދެއްނަމަ އަދި އެމެރިކާ ސިފައިންނަށް ހަމަލާ ދިނުމުގެ ގާބިލްކަން ލިބިފައިވާ އުޅަނދެއްނަމަ އެ އުޅަނދަކަށް ހަމަލާދީ ފައްތާލުމަކީ ކުރިމަތިލުންތަކުގެ އުސޫލުގައި ކަނޑައެޅިފައިވާ ކަމެއް ކަމަށްވެސް ޖެނެރަލް މާކް ކިމިޓް ބުނެފައި ވެއެވެ.

އީރާނުގެ ކަނޑުގެ ސިފައިން މަނަވަރު އައީ ބައިނަލްއަގްވާމީ ބަނދަރެއްގައި އޮވެފައި ކަމަށާއި، އެ މަނަވަރު ޕާޝިއަން ގަލްފަށް ވަދެއްޖެނަމަ އެ މަނަވަރަކީ ޕާޝިއަން ގަލްފް ސަރަހައްދުގައި ހަރަކާތްތެރިވާ އެމެރިކާގެ މަނަވަރުތަކަށް ނުރައްކާ ކޮށްފާނެ އުޅަނދެއް ކަމަށްވެސް ކިމިޓް ބުނެފައި ވެއެވެ.

އީރާނުގެ މަނަވަރު “އައިއާރްއައިއެސް ދީނާ” ސްރީލަންކާ ކައިރިން ބައިނަލްއަގްވާމީ ކަނޑުގެ ސަރަހައްދުން ދަތުރު ކޮށްފައި ދަނިކޮށް ހަމަލާދީފައިވަނީ އެމެރިކާގެ ކަނޑުގެ ސިފައިންގެ ސަބްމެރިން އަކުންނެވެ.

މަނަވަރަށް ހަމަލާދީ ފައްތާލާ މަންޒަރުގެ ވީޑިއޯ އެމެރިކާ ސަރުކާރުގެ ހަނގުރާމައިގެ މިނިސްޓްރީން ވަނީ އާންމުވެސް ކޮށްފައެވެ.

އީރާނުގެ ކަނޑުގެ ސިފައިންގެ މަނަވަރު އެނބުރި އީރާނަށް ދަތުރުކުރީ، އިންޑިއާއިން ބޭއްވި ކަނޑުގެ ސިފައިންގެ ބައިނަލްއަގްވާމީ އެކްސަސައިޒެއްގައި ބައިވެރިވުމަށް ފަހު، އިންޑިއާގެ ބަނދަރެއްގައި އޮތުމަށް ފަހުގައެވެ.

އެމެރިކާއިން ހަމަލާދީ މަނަވަރު ފައްތާލިއިރު އޭގައި 180 ކަނޑުގެ ސިފައިން ތިއްބެވެ.

އެމެރިކާއިން ހަމަލާ ދިނުމުން މަނަވަރުން ޑިސްޓްރެސް ކޯލްއެއް ދިނުމުން އެހީތެރިވާން ގޮސްފައިވަނީ ސްރީލަންކާ ކަނޑުގެ ސިފައިންނެވެ.

ސްރީލަންކާއިން ބުނެފައިވަނީ، އެމީހުންނަށް ދިރިތިއްބާ ސަލާމަތް ކުރެވުނީ 32 މީހުން ކަމަށެވެ. ސަލާމަތްވި މީހުންގެ ތެރޭގައި ސީނިއަރ އޮފިސަރުންނާއި، މަނަވަރުގެ ކޮމާންޑަރުވެސް ހިމެނޭ ކަމަށް ސްރީލަންކާއިން ބުނެއެވެ.

އަދި މިހާތަނަށް މަރުވެފައިވާ 87 މީހެއްގެ ހަށިގަނޑު ސްރީލަންކާގެ ހޮސްޕިޓަލަށް ގެންގޮސްފައި ވާއިރު، 61 މީހަކު އަދިވެސް ނުފެންނަ ކަމަށް ބުނެފައި ވެއެވެ.

މިހާދިސާގައި އީރާނުގެ ކަނޑުގެ ސިފައިންގެ އެތައް ބަޔަކު މަރުވެފައިވާތީ، ސްރީލަންކާގެ ޚާރިޖީ ވަޒީރު ވިޖިތާ ހީރަތުވަނީ އީރާނަށް ތައުޒިޔާ ފޮނުއްވާފައެވެ.

އީރާނާއި ސްރީލަންކާއަކީ ވަރަށް ގާތް އެކުވެރި ދެގައުމެވެ. ސްރީލަންކާގެ ތަރައްގީގެ ބޮޑެތި އެތައް މަޝްރޫއަކަށް އީރާނުން އެހީވަމުންވެސް ގެންދެއެވެ.