އީރާނަށް ހަމަލާދޭން ސްޕެއިންގެ ބޭސްތައް ބޭނުން ކުރުމުގެ ހުއްދަ އެމެރިކާ ސިފައިންނަށް ނުދިން މައްސަލާގައި ސްޕެއިނާއި އެމެރިކާއާ ދެމެދު އޮތް ވިޔަފާރީގެ ހުރިހާ ގުޅުންތައް ކަނޑާލަން ގަސްތުކުރާކަން އެމެރިކާގެ ހަނގުރާމައިގެ ރައީސް ޑޮނަލްޑް ޓްރަމްޕް އިއުލާން ކޮށްފިއެވެ.

ޖަރުމަނުގެ ޗާންސެލަރއާ ބައްދަލު ކުރުމަށްފަހު ނޫސްވެރިންނާ ވާހަކަ ދައްކަމުން ޓްރަމްޕް ވަނީ، ސްޕެއިންގެ ނިންމުމަށް ވަރަށް ބޮޑަށް ނުރުހުން ފާޅުކޮށްފައެވެ. އަދި ސްޕެއިނާއެކު އޮންނަ ވިޔަފާރީގެ ހުރިހާ ގުޅުންތައް ކަނޑާލަން ޓްރެޜަރީ ސެކްރެޓަރީ ސްކޮޓް ބެސެންޓްއަށް އަންގާފައިވާނޭ ކަމަށްވެސް ޓްރަމްޕް ބުންޏެވެ.

އަދި ސްޕެއިނާއެކު ވިޔަފާރީގެ އެއްވެސް މުއާމަލާތެއް ކުރަން ބޭނުން ނުވާކަންވެސް ހާމަކުރިއެވެ.

މީގެއިތުރުން، ސްޕެއިނުން ހުއްދަދިނަސް ނުދިނަސް، އެމެރިކާ ސިފައިން ބޭނުންވެއްޖެ ހިނދެއްގައި ސްޕެއިންގެ އަސްކަރީ ބޭސްތައް އެމެރިކާ ސިފައިންނަށް ބޭނުން ކުރެވޭނޭ ކަމުގެ އިންޒާރުވެސް ޓްރަމްޕް ދީފައި ވެއެވެ.

އެމެރިކާގެ ހަނގުރާމައިގެ ރައީސް ޓްރަމްޕްވަނީ، އީރާނަށް ހަމަލާ ދިނުމުގައި ޖަރުމަނުވިލާތާއި، އަދި ޔޫރަޕްގެ އެހެން ގައުމުތަކުން އެމެރިކާއަށް  ވެދެމުން އަންނަ އެހީތެރިކަމާއި، ދެމުން އަންނަ ތާއީދަށް ތައުރީފް ކޮށްފައެވެ.

އެމެރިކާއާއި އިސްރާއީލު ގުޅިގެން އީރާނާ ދެކޮޅަށް ފަށާފައިވާ ހަނގުރާމަ، ސްޕެއިންގެ ބޮޑުވަޒީރު ޕެޑްރޯ ސަންޗޭޒްވަނީ ވަރަށް ބޮޑަށް ކުށްވެރި ކުރައްވާފައެވެ. އަދި އީރާނަށް ހަމަލާދޭން ސްޕެއިންގެ ބިމުގެ އަދި ވައިގެ ސަރަހައްދުވެސް ބޭނުން ނުކުރެވޭނޭ ކަމަށް އަންގާފައި ވެއެވެ.

ސްޕެއިނަކީ، ޔޫރަޕްގެ ގައުމުތަކުގެ ތެރެއިން އީރާނަށް ދެމުންގެންދާ ހަމަލާތައް ކުށްވެރިކުރި ހަމައެކަނި  ގައުމެވެ.