މީޑިއާތަކާއި ބްރޯޑްކާސްޓަރުންގެ ބެލެނިވެރިފަރާތެއްގައި ދާދި ފަހުން ޤާއިމްކުރި، މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނުގެ ލޯގޯ ބޭނުން ކުރަން ފަށައިފިއެވެ.
އެކޮމިޝަނުގެ އައު ލޯގޯ ބޭނުން ކުރަން ފަށާފައިވަނީ މާރިޗު މަހުގެ 3 ވަނަ ދުވަހުން ފެށިގެންނެވެ. މި ލޯގޯ ފަރުމާކޮށްފައިވަނީ ކޮމިޝަންގެ މަޤްޞަދުތަކާއި އެއްގޮތަށް ކަމަށް މީޑިއާ އަދި ބްރޯޑްކާސްޓިން ކޮމިޝަން (އެމްއެމްބީސީ) އިން ވިދާޅުވެއެވެ. ކޮމިޝަނުގެ ލޯގޯ ހަތަރު ބަޔަކަށް ވަނީ ބަހާފައެވެ.
ކޮމިޝަނުގެ ލޯގޯއިން ރަމްޒުކޮށްދޭ ކޮމާކޯޅި ދައްކުވައިދެނީ، ޚިޔާލުފާޅުކުރުމުގެ މިނިވަންކަން ކަމަށާއި، ބްރޯޑްކާސްޓިން ވޭވްސް ދައްކުވައިދެނީ، މައުލޫމާތު ފެތުރިގެންދާ ހަލުވި މިންކަމަށް އެމްއެމްބީސީން ވިދާޅުވިއެވެ. އަދި ލޯގޯ ހަތަރު ބައެއް ރަމްޒުކޮށްދޭއިރު މިކަމުން މީޑިއާ އަކީ ހަތަރުވަނަ ބާރުކަން ދައްކުވައިދޭ ކަމަށް އެ ކޮމިޝަނުން ވިދާޅުވިއެވެ. މީގެ އިތުރުން ކޮމިޝަނުގެ ލޯގޯއިން ރަމްޒުކޮށްދޭ ތާނައިގެ ތިން އަކުރު، “މ”، “ބ” އަދި “ކ” ދައްކުވައިދެނީ، ދިވެހި ބަހާއި ސަޤާފަތަށް ދޭ އަހަމީއްޔަތުކަން ކަމަށް މީޑިއާ ކޮމިޝަނުން ވިދާޅުވިއެވެ.
އެމްއެމްބީސީން ވިދާޅުވީ މި އައު ލޯގޯއާއެކު، ކޮމިޝަނުގެ އެންމެ ބޮޑު އަމާޒަކީ ރާއްޖޭގެ މީޑިއާގެ މިނިވަންކަން ދަމަހައްޓައި ޒިންމާދާރު ނޫސްވެރިކަމުގެ ސަޤާފަތެއް ކުރިއެރުވުމަށް ކުރާ މަސައްކަތް އިތުރަށް ހަރުދަނާ ކުރުން ކަމަށެވެ.
ކިޔުންތެރިންގެ ހިޔާލު