އިދިކޮޅު ކައުންސިލެއް އޮންނަންޖެހެނީ ސަރުކާރު ޖަވާބުދާރީކުރުވުމަށްކަމަށް އިދިކޮޅުން ބުނިނަމަވެސް، ލާމަރުކަޒީ އެއްވެސް އުސޫލެއްގައި ކައުންސިލްތަކުން ސަރުކާރު ޖަވާބުދާރީ ކުރުވަންޖެހޭކަމަށް ނޯންނަކަމަށް މާލެ ސިޓީ ގްރޫޕް އޮފް ހޮސްޕިޓަލްގެސް ސީއީއޯ އިބްރާހީމް ޢަބްދުއް ރައްޒާޤް ޙަލީމް ވިދާޅުވެއްޖެއެވެ. ޙަލީމް މިހެން ވިދާޅުވީ ޕީއެންސީން ރޭ ބޭއްވި ގަލޮޅު ދެކުނު ކެމްޕެއިން އިފްތިތަޙްކުރުމުގެ ހަރަކާތުގައި ވާހަކަފުޅު ދައްކަވަމުންނެވެ.

ކުރިއަށް އޮތް ލޯކަލް ކައުންސިލްތަކުގެ އިންތިޚާބުގައި ސަރުކާރާ އިދިކޮޅު މެންބަރުން އިންތިޚާބުކުރަންޖެހެނީ ސަރުކާރު ޖަވާބުދާރީކުރުވުމަށްކަމަށް ބުނެ އިދިކޮޅުން ދައްކާ ވާހަކަތަކަށް ޙަލީމް ރޭ ވަނީ ރައްދު ދެއްވައި ވާހަކަ ދައްކަވާފައެވެ. އެގޮތުން އޭނާ ވިދާލުވީ ލާމަރުކަޒޫ އުސޫލުގެ ދަށުން ކައުންސިލްތަކަށް ގިނަ ބާރުތަކެއް ދީފައިވާއިރު އެއިން އެއްވެސް އުސޫލެއްގައި ސަރުކާރު ޖަވާބުދާރީ ކުރުވަންޖެހޭނެކަން ހިމަނާފައި ނެތްކަމަށެވެ. އެ އުސޫލުގައި ބަޔާންކުރާގޮތުގައި ކައުންސިލްތަކުގައި ތިއްބަވާނީ ރައްޔިތުންގެ ތަރައްޤީއާއި ލާބަޔަށް މަސައްކަތްކުރާ ބައެއްކަމަށް ޙަލީމް ވިދާޅުވިއެވެ. އަދި  ލާމަރުކަޒީ އުސޫލުން ރާއްޖޭގެ އިދާރީ ދާއިރާތައް ހިންގުމުގެ ބޭނުމަކީ އެކި ރަށްރަށު ރައްޔިތުންގެ ކަންކަން ޑިމޮކްރަސީ އަދި ޖަވާބުދާރީ ވެނިވި އުސޫލަކުން ރައްޔިތުން އަމިއްލައަށް ނިންމުމަށް މަގުފަހިކޮށް، އިޖުތިމާޢީ ގޮތުންނާއި، އިޤްތިޞާދީ ގޮތުންނާއި، ސަގާފީ ގޮތުން ދިވެހިރާއްޖޭގެ ރަށްރަށުގައި ދިރިއުޅޭ ރައްޔިތުންގެ ފެންވަރު މަތިކޮށް ރައްޔިތުން ބާރުވެރިކޮށް ރައްޔިތުންނާއި އެންމެ ގާތުން ފުޅާ ދާއިރާއެއްގައި ޚިދުމަތް ލިބޭނެ މަގުފަހިކޮށްދީ ރަށްރަށުގައި އަމާން ވެއްޓެއް ގާއިމު ކުރުމަށްކަމަށްވެސް އޭނާ ވިދާޅުވިއެވެ.

ލާމަރުކަޒީގެ އެއްވެސް އުސޫލެއްގައި ނުވޭ ސަރުކާރު ޖަވާބުދާރީ ކުރުވަން ޖެހޭ ކަމަކަށް. އެއްވެސް ދިމާލަކުން ހޯދައި ބެލުމުންވެސް ކައުންސިލްތަކުގެ މެންބަރުންނަކީ ސަރުކާރު ޖަވާބުދާރީ ކުރުވަން ޖެހޭ ބައެއް ބައެއް ކަމަށް ފެނިފައެއް ނުވޭ.

އިބްރާހީމް ޢަބްދުއްރައްޒާޤް ޙަލީމް ވިދާޅުވިއެވެ.

ޙަލީމް ވިދާޅުވިގޮތުގައި ލާމަރުކަޒީ އުސޫލުން ކަންކަން ކޮށްދިނުމަށް ފަސޭހަވަނީ ސަރުކާރުގެ ކެންޑިޑޭޓުންނަށެވެ.

ޙަލީމް ވަނީ ރައީސުލްޖުމްހޫރިއްޔާ ޑރ. މުޙައްމަދު މުިއްޒުގެ ތަރައްޤީގެ ތަސައްވުރާ ގުޅޭގޮތުންވެސް ވާހަކަފުޅު ދައްކަވާފައެވެ. އެގޮތުން އެމަނިކުފާނު ދެކެވަޑައިގެންފައިވާ ތަސައްވުރު ހަގީގަތަކަށް ހެދޭނީ ހަމައެކަނި މި އުސޫލުން، މި ބޭނުމުގައި މަސައްކަތް ކުރައްވާ ކެންޑިޑޭޓުން ހޮވައިގެންކަމަށް އިބްރާހީމް ޢަބްދުއްރައްޒާޤް ޙަލީމް ވިދާޅުވިއެވެ.