ރާއްޖޭގެ ފަތުރުވެރިކަމުގެ ތާރީޚުގައި ވެސް އެއް ދުވަހެއްގެ މައްޗަށް އެންމެ ގިނަ އަދަދަކަށް ފަތުރުވެރިން ޒިޔާރަތްކުރި ދުވަހުގެ ރެކޯޑު މިދިޔަ އާދިއްތަ ދުވަހު މުގުރާލައިފިއެވެ. ޓޫރިޒަމް މިނިސްޓްރީން ހާމަކޮށްފައިވާ ގޮތުގައި، އެ ދުވަހު އެކަނިވެސް ރާއްޖެއަށް 10،253 ފަތުރުވެރިން ވަނީ ޒިޔާރަތްކޮށްފައެވެ. މިއީ މީގެ ކުރިން، 2024 ވަނަ އަހަރުގެ ފެބްރުއަރީ 10 ވަނަ ދުވަހު 10،213 ފަތުރުވެރިން ޒިޔާރަތްކޮށްގެން ހަދާފައިވާ ރެކޯޑަށްވުރެ އިތުރު އަދަދެކެވެ.
މިނިސްޓްރީން ދެކޭ ގޮތުގައި މި އާ ރެކޯޑަކީ ރާއްޖޭގެ ފަތުރުވެރިކަން ދެމެހެއްޓެނިވި ގޮތެއްގައި ކުރިއަރަމުން އަންނަކަމުގެ ހެއްކެކެވެ. އަދި މިއީ ރާއްޖެ އިޝްތިހާރު ކުރުމަށް ސަރުކާރާއި ކަމާބެހޭ ފަރާތްތަކުން ކުރަމުންދާ މަސައްކަތްތަކުގެ ކާމިޔާބީއެއް ކަމަށްވެސް އެ ވުޒާރާއިން ސިފަކުރެއެވެ. ތަފާސްހިސާބުތަކަށް ބަލާއިރު، މިހާރު ދުވާލެއްގެ މައްޗަށް އެވްރެޖުކޮށް 7،000 އަށްވުރެ ގިނަ ފަތުރުވެރިން ރާއްޖެ ޒިޔާރަތްކުރެއެވެ. މި އަހަރުގެ މިހާތަނަށް ޖުމްލަ 235،041 ފަތުރުވެރިން ޒިޔާރަތްކޮށްފައިވާއިރު، މިއީ މިދިޔަ އަހަރުގެ މި މުއްދަތާ އަޅާބަލާއިރު 4.8 އިންސައްތައިގެ ކުރިއެރުމެކެވެ.
މާކެޓްތަކަށް ބަލާއިރު، މިވަގުތު ރާއްޖެއަށް އެންމެ ގިނައިން ފަތުރުވެރިން އަންނަނީ ރަޝިއާއިންނެވެ. އެގޮތުން ރަޝިއާއިން 30،484 ފަތުރުވެރިން އައިސްފައިވާއިރު، ދެވަނައަށް އެންމެ ގިނައިން ފަތުރުވެރިން އައިސްފައިވަނީ ޗައިނާއިންނެވެ. ޗައިނާއިން 24،576 ފަތުރުވެރިން އަދި ތިންވަނައިގައި އޮތް އިޓަލީން 24،498 ފަތުރުވެރިން ޒިޔާރަތްކޮށްފައިވެއެވެ. މީގެ އިތުރުން އިނގިރޭސިވިލާތް، ޖަރުމަނު، އިންޑިއާ އަދި ފްރާންސް ފަދަ ޤައުމުތަކަކީވެސް ފާހަގަކޮށްލެވޭ މާކެޓްތަކެކެވެ.
ރާއްޖެ އަންނަ ފަތުރުވެރިންގެ ތެރެއިން ބޮޑު އިންސައްތައެއް، އެއީ ގާތްގަނޑަކަށް 68 އިންސައްތަ މީހުން ޗުއްޓީ ހޭދަކުރަނީ ރިސޯޓުތަކުގައެވެ. ގެސްޓްހައުސްތަކުގައި ޗުއްޓީ ހޭދަކުރަނީ 26.6 އިންސައްތަ ފަތުރުވެރިންނެވެ. މިދިޔަ އަހަރު ސަރުކާރުން ކަނޑައެޅި 2.3 މިލިއަން ފަތުރުވެރިންގެ އަމާޒަށް ވާސިލުނުވެ، އަހަރު ނިމުނީ 2.2 މިލިއަން ފަތުރުވެރިންނާއެކު ކަމަށްވިޔަސް، މި އަހަރުގެ އަމާޒަކީ 2.4 މިލިއަން ފަތުރުވެރިން ރާއްޖެ ގެނައުމެވެ. އަހަރުގެ ކުރީކޮޅު ފެންނަމުންދާ މިފަދަ ރެކޯޑު އަދަދުތަކާއެކު، ފަތުރުވެރިކަމުގެ ސިނާއަތަށް އުއްމީދީ ފެށުމެއް ވަނީ ލިބިފައެވެ.
ކިޔުންތެރިންގެ ހިޔާލު