އެސްއެސްސީ އިމްތިހާނުގެ ވަކި މާއްދާއެއްގެ ގޮތުގައި ޤުރްއާން ހިމަނަން ތައުލީމީ ވުޒާރާއިން ނިންމައިފިއެވެ.
ތައުލީމީ ވަޒީރު ޑރ. އިސްމާއިލް ޝަފީޢު ވިދާޅުވީ، މި އަހަރު ޕައިލެޓް ޕްރޮގްރާމެއްގެ ގޮތުގައި ޤުރްއާން މާއްދާ ގެންގޮސް 2027 ވަނަ އަހަރު އިމްތިހާނު ދޭން ނިންމާފައިވާ ކަމަށެވެ.
ދިރާސީ އައު އަހަރުގެ ހިޠާބުގައި ވަޒީރު ވިދާޅުވި ގޮތުގައި، މި އަހަރު އެންމެ ބޮޑު އިސްކަމެއް ދޭނީ ދަރިވަރުންގެ ކިބައިގައި ރިވެތި އަހުލާގު އަށަގެންނެވުމަށެވެ. ކޮންމެ ދަރިވަރަކީ ވެސް، ރިވެތި އާދަތަކާއި ސިފަތަކާއެކު އަނެކަކަށް އިހުތިރާމްކުރާ ދަރިވަރުން ތަކަކަށް ހެދުމަށް މި އަހަރު ހާއްސަ ޕްރޮގްރާމެއް ފަށަން ނިންމާފައިވާކަން އެމަނިކުފާނު ވަނީ އިއުލާން ކުރައްވާފައެވެ. އަދި 2027 ވަނަ އަހަރުގެ ސާނަވީ އިމްތިހާނުގައި ޤުރުއާން މާއްދާ ރަސްމީކޮށް ހިމަނާ ރާއްޖޭގެ ދަރިވަރުންނަށް އެ އިމްތިހާނު ދިނުމަށް ހަމަޖެހިފައިވާކަމަށް ވަޒީރު ވިދާޅުވިއެވެ.
އަމިއްލަ އުނގެނުމަށް ޒިންމާވާ ދަރިވަރަކަށް ހުރިހާ ދަރިވަރުން ވުމަށާއި އިސްލާމް ދީނަށް ލޯބިކުރާ މައިންބަފައިންނަށް ކިޔަމަންތެރިވެ އެކަކު އަނެކަކަށް އިހްތިރާމްކުރާ ބަޔަކަށް ދަރިވަރުން ވުމަށް ވަޒީރުގެ ހިޠާބުގައި ނަސޭހަތްތެރިވެ ވަޑައިގެންނެވިއެވެ. އުނގެނުމަށް ލިބިފައިވާ ރަނުގެ ފުރުސަތުގެ ބޭނުން އެންމެ ހެޔޮގޮތުގައި ހިފައި މުދައްރިސުން ދެކެ ލޯބިވާ އަދި މުދައްރިސުންނަށް އިހުތިރާމްކުރާ ބަޔަކަށް ވުމަށްވެސް ވަޒީރު އެދިވަޑައިގަތެވެ.
ވަޒީރު ވިދާޅުވީ، އާޓިފިޝަލް އިންޓަލިޖެންސް (އޭއައި) ގެ ބޭނުންތެރިކަން މަސައްކަތުގެ މާހައުލުގައި ބޮޑުވެފައިވާއިރު، މިފެށުނު ދިރާސީ އަހަރުވެގެންދާނީ ސްކޫލުތަކުގެ މުދައްރިސުން އޭއައިއަށް އަހުލުވެރި ކުރުވުމުގެ ހާއްސަ ޕްރޮގްރާމްތަކެއް ކުރިއަށް ގެންދާނެ އަހަރަކަށް ކަމަށެވެ.
ކިޔުންތެރިންގެ ހިޔާލު