ޗައިނާއަށް އަސްކަރީ ބަޣާވާތެއް ގެނެސް ރައީސް ޝީ ޖިންޕިން މަގާމުން ދުރުކުރަން އުޅުނު ކަމުގެ ރިޕޯޓްތަކެއް ފެތުރެމުން އެބަ ދެއެވެ.

ޗައިނާގެ އެތެރޭގެ ބައެއް މަސްދަރުތަކާ ހަވާލާދީ ދުނިޔޭގެ ބޮޑެތި ބައެއް މީޑިއާ ވަސީލަތްތަކުން ގެންދަނީ މިކަން ރިޕޯޓް ކުރަމުންނެވެ. ޗައިނާގެ އިދިކޮޅު މީޑިއާ ވަސީލަތްތަކުން މިކަން ރިޕޯޓް ކުރަމުން އެބަ ގެންދެއެވެ.

އަސްކަރީ ބަޣާވާތް ގެނެސް ރައީސް ޝީ މަގާމުން ދުރުކުރުމުގެ އަޑީގައި ހުރި ކަމަށް ބުނަނީ، ޗައިނާގެ އަސްކަރިއްޔާގެ އެންމެ އިސް ޖެނެރަލް އަދި ޗައިނާގެ ސެންޓްރަލް މިލިޓަރީ ކޮމިޝަންގެ ވައިސް ޗެއަރމަން ޒަންގް ޔޫޝިއާއެވެ.

ޒަންގް ޔޫޝިއާއަކީ ރައީސް ޝީ ޖިންޕިން އެންމެ އިތުބާރު ކުރައްވާ އަދި ވެރިކަންކުރާ ކޮމިއުނިސްޓް ޕާޓީގެ ދެވަނައަށް އެންމެ ބާރުގަދަ ލީޑަރުވެސް މެއެވެ.

ރައީސް ޝީ ޖިންޕިން ވެރިކަމުން ދުރުކުރުމަށް މަސައްކަތް ކުރުމުގައި ޗައިނާ އަސްކަރިއްޔާގެ އިސް އެހެން ޖެނެރަލެއް ކަމަށްވާ ޗީފް އޮފް ދަ ޖޮއިންޓް ސްޓާފް ލިއު ޒެންލީވެސް ބައިވެރިވާ ކަމަށް ރިޕޯޓްތައް ބުނެއެވެ.

މި ތުހުމަތުތަކާ ގުޅިގެން އެ ދެ ޖެނެރަލުންނާއި، އެމީހުންގެ އާއިލާތަކާއި އަދި ސިފައިންގެ އިތުރު ތިންހާހެއްހާ މީހުން މިހާތަނަށް ހައްޔަރު ކޮށްފައިވާ ކަމަށް ރިޕޯޓްތައް ބުނެއެވެ.

ބަޣާވާތް ކުރަން އުޅުނު ސިފައިން ޗައިނާގެ ރައީސް ޝީ ޖިންޕިން ހައްޔަރު ކުރަން އުޅުނީ ބެއިޖިންގެ ހޮޓަލެއްގައި ހުންނަވަނިކޮށް މިމަހުގެ 18 ދުވަހު ކަމަށް ވެއެވެ.

ނަމަވެސް، އެކަމުގެ ޖާސޫސީ މައުލޫމާތު ރައީސް ޝީ ޖިންޕިންއަށް ދެ ގަޑިއިރު ކުރިން ލިބިވަޑައިގެން އެކަމަށް ފިޔަވަޅު އެޅުއްވީ ކަމަށް ވެއެވެ. އަދި އެކަމުގެ އަޑީގައި ތިބި މީހުން ހައްޔަރު ކުރެއްވީ ކަމަށްވެސް ވެއެވެ.

ރައީސް ޝީ ޖިންޕިން ހައްޔަރު ކުރަން އުޅޭކަމުގެ މައުލޫމާތު ލީކްކޮށްލީ އެކަމުގައި ބައިވެރިކޮށްގެން އުޅުނު ބަޔަކު ކަމަށް ބުނެއެވެ.

އަސްކަރީން ބަޣާވާތް ކުރަން އުޅުނު ވާހަކަތަކެއް ޗައިނާގެ ރަސްމީ އިދާރާތަކުން ހާމަކޮށްފައެއް ނުވެއެވެ.

އެހެން ނަމަވެސް، ޖެނެރަލް ޒަންގް ޔޫޝިއާ އާއި، ޖެނެރަލް ލިއު ޒެންލީގެ މައްޗަށް ތަހްގީގުތަކެއް ހިންގަން ފަށާފައިވާކަން ޗައިނާ ސަރުކާރުގެ މިނިސްޓްރީ އޮފް ނޭޝަނަލް ޑިފެންސުން ހާމަކޮށްފައި ވެއެވެ.

އެދެ ޖެނެރަލުންގެ މައްޗަށް ތަހްގީގު ހިންގަނީ، “އަޚްލާގީ ސީރިއަސް މައްސަލަތަކާއި ގާނޫނާ ޚިލާފް އަމަލުތަކެއް ހިންގިކަމުގެ ތުހުމަތުގައި” ކަމަށް ބުނެފައި ވެއެވެ.

ބައެއް މީޑިއާ ވަސީލަތްތަކުން ބުނަނީ، އަސްކަރީ އިސް ދެ ޖެނެރަލުން ހައްޔަރުކުރީ، ޗައިނާގެ ނިއުކްލިއަރ ހަތިޔާރު ޕްރޮގްރާމާބެހޭ މުހިންމު ޓެކްނިކަލް މައުލޫމާތުތަކެއް އެމެރިކާއަށް ދިންކަން އެނގިގެން ކަމަށާއި، އެކަން ކުރުމަށް ޖެނެރަލުން ވަރަށް ބޮޑެތި އަދަދުތަކުން ރިޝްވަތު ނެގިކަމުގެ ވާހަކަތައްވެސް ފެތުރިފައި ވެއެވެ.