ވެނެޒުއޭލާގައި ރައްކާތެރި ވެރިކަމެއް ގާއިމްވަންދެން އެގައުމުގެ ވެރިކަން ބަލަހައްޓާނީ އެމެރިކާއިން ކަމަށް ރައީސް ޑޮނަލްޑް ޓްރަމްޕު ވިދާޅުވެއްޖެއެވެ.

އެމެރިކާގެ އަސްކަރިއްޔާ ވެނެޒުއޭލާއަށް ވަދެ ރައީސް ނިކޮލަސް މަޑޫރޯއާއި އޭނާގެ އަނބިކަނބަލުން ހައްޔަރުކޮށްފައިވާއިރު، މަޑޫރޯ އެމެރިކާ ސިފައިންގެ ބެލުމުގައި ހުރި ފޮޓޯއެއް ޓްރަމްޕު މިރޭ ވަނީ އާންމުކުރައްވާފައެވެ.

ވެނެޒުއޭލާގެ ހާލަތާއިބެހޭ ނޫސްވެރިންގެ ބައްދަލުވުމުގައި ވާހަކަދައްކަވަމުން ޓްރަމްޕު ވިދާޅުވީ ރަނގަޅު ޓްރާންސިޝަނެއް ލިބެންދެން ވެނެޒުއޭލާ ހިންގާނީ އެމެރިކާއިން ކަމަށެވެ. އެގައުމުގެ ވެރިކަން ހިންގުމުގައި އަމަލީގޮތުން ހަރަކާތްތެރިވަނީ ފޮރިން ސެކްރެޓަރީ މާކޯ ރޫބިއޯއާއި ޑިފެންސް ސެކްރެޓަރީ ޕީޓް ހެގްސެތް ކަމުގެ އިޝާރާތެއްވެސް ޓްރަމްޕު ދެއްވިއެވެ.

ޓްރަމްޕު ވަނީ މަޑޫރޯ އެމެރިކާއަށް މަސްތުވާތަކެތި ވެއްދުމަށް އެހީތެރިވަމުންދާކަމަށް ތުހުމަތުކުރައްވާފައެވެ. ނަމަވެސް މަޑޫރޯ ތުހުމަތުކުރައްވަނީ ޓްރަމްޕު އެގައުމުގެ ތެލުގެ ރިޒާވްގެ ކޮންޓްރޯލް ނެގުމަށް މަސައްކަތްކުރައްވާކަމަށެވެ.