އަންނަ އަހަރު ބޭއްވުމަށް ހަމަޖެހިފައިވާ ލޯކަލް ކައުންސިލް އަދި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ (ޑަބްލިއުޑީސީ) އިންތިޚާބުގައި، ޕީޕަލްސް ނެޝަނަލް ކޮންގްރެސް (ޕީއެންސީ) ގެ ޓިކެޓުގައި ވާދަކުރަން ބޭނުންވާ ކެންޑިޑޭޓުން ހޮވުމަށް ބާއްވާ ޕްރައިމަރީގައި ބައިވެރިވުމުގެ ފުރުޞަތު، މާދަމާއިން ފެށިގެން ހުޅުވާލާނެކަމަށް އެ ޕާޓީން މިއަދު ހާމަކޮށްފިއެވެ.

ޕީއެންސީގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން، ޕީއެންސީގެ ޕާލިމެންޓަރީ ގުރޫޕުގެ ލީޑަރު އަދި ކެންޕެއިން މެނޭޖަރު އިބްރާޙީމް ފަލާޙު ވިދާޅުވީ، ލޯކަލް ކައުންސިލް އަދި ޑަބްލިއުޑީސީ އިންތިޚާބާއި ގުޅިގެން ޕީއެންސީން ބާއްވާ ޕްރައިމަރީގައި ވަރަށް ގިނަ ޢަދަދެއްގެ ކެންޑިޑޭޓުން ވާދަކުރާނެކަމަށް ލަފާކުރެވޭ ކަމަށެވެ.

”އަޅުގަނޑުމެންގެ މި އިންތިޚާބު ވެގެންދާނީ މިހާތަނަށް ރާއްޖޭގައި ބޭއްވޭ އެންމެ ބޮޑު ޕްރައިމަރީއަށް ކަމަށް އަޅުގަނޑުމެންނަށް ގަބޫލުކުރެވޭ. ވަރަށް ގިނަ މެންބަރުން މިހާރުވެސް މިކަމުގެ ޝައުގުވެރިކަން ހާމަކުރައްވައިފި،“ ފަލާޙު

ފަލާޙު އިތުރަށް ވިދާޅުވި ގޮތުގައި، ޕްރައިމަރީގައި ބައިވެރިވުމުގެ ފުރުޞަތު މާދަމާއިން ފެށިގެން ޑިސެންބަރު މަހުގެ 15 ގެ ނިޔަލަށް ހުޅުވާލެވޭނެއެވެ. ކުރިމަތިލެވޭނީ ޕާޓީގެ ވެބްސައިޓުގައި އޮންނަ އޮންލައިން ފޯމެއް މެދުވެރިކޮށެވެ. އަދި، މިވަގުތު ޕާޓީގެ މެންބަރެއްގެ ގޮތުގައި ދަފުތަރުވެފައިވާ ފަރާތްތަކަށް އެކަންޏެވެ. އިލެކްޝަންސް ކޮމިޝަނުން ހާމަކުރައްވާފައިވާ ސިޔާސީ ޕާޓީތަކުގެ ދަފުތަރުގައިވާ ގޮތުން، ޕީއެންސީގައި މިހާރު 68،665 މެންބަރުން އެބަތިއްބެވެ.

ޕީއެންސީގެ ޕްރައިމަރީގެ ވޯޓުލުން އަންނަ މަހު 27 ގައި ބޭއްވުމަށް ހަމަޖެހިފައިވާއިރު، ފަލާޙު ވިދާޅުވީ ޕްރައިމަރީގައި ވޯޓުލެވޭނީ އެ މީހެއްގެ ރަޖިސްޓްރީ އޮންނަ ރަށެއްގައި ބަހައްޓާ ވޯޓު ފޮއްޓަށްކަމަށާއި މާލޭގައި ރަށްރަށުގެ ވޯޓު ފޮށިތައް ނުބަހައްޓާނެކަމަށެވެ.

މީގެއިތުރުން، ޕްރައިމަރީގައި ވާދަނުކޮށް އެއްވެސް މީހަކަށް ޓިކެޓެއް ނުދޭނެ ކަމަށާއި ޕްރައިމަރީގެ ހުރިހާ ކަމެއްވެސް ކުރިއަށް ގެންދާނީ ވަރަށް އިންސާފުވެރިކޮށް އަދި ހާމަކަން ބޮޑު ގޮތެއްގައި ކަމަށް ފަލާޙު ވިދާޅުވިއެވެ.

ލޯކަލް ކައުންސިލްތަކުގެ އިންތިޚާބާއި ޑަބްލިއުޑީސީ އިންތިޚާބަށް ޢާންމުން ހޭލުންތެރިކުރުމުގެ މަސައްކަތް އިލެކްޝަންސް ކޮމިޝަނުން މިހާރު ވަނީ ފަށައިފައެވެ. އެގޮތުން، މިހާރުވެސް 12 އަތޮޅެއްގެ 36 ރަށެއްގައި މީހުން ހޭލުންތެރިކުރުމަށް އެ ކޮމިޝަންގެ ޓީމުތައް އަންނަނީ ޙަރަކާތްތެރިވަމުންނެވެ.