ކުރިއަށް އޮތް ލޯކަލް ކައުންސިލް އިންތިހާބުގައި އިދިކޮޅު އެމްޑީޕީގެ ކެންޑިޑޭޓުން އިންތިހާބުވެއްޖެނަމަ، ސަރުކާރާ ދެކޮޅަށް މަސައްކަތް ކުރާނެ ކަމަށް ނައިބު ރައީސް ހުސައިން މުހައްމަދު ލަތީފް ވިދާޅުވެއްޖެއެވެ.
ޕީއެންސީގެ ހދ. އަތޮޅުގެ ކެމްޕެއިން ޖަގަހަ މާލޭގައި ހުޅުވަން ރޭ ބޭއްވި ޖަލްސާގައި ނައިބް ރައީސް ވިދާޅުވީ ބޭނުންވަނީ ރަށްރަށުގެ ތަރައްގީއަށް ސަރުކާރުންކުރަމުންދާ މަސައްކަތްތަކަށް އެހީތެރިކަންފޯރުކޮށްދީ އެއްބާރުލުން ދޭނެ ކައުންސިލަރުންތަކެއް ކަމަށެވެ.
އިދިކޮޅު ކެންޑިޑޭޓުން ކެމްޕޭންތަކުގައި ދައްކާ ވާހަކައަކީ ސަރުކާރުކާރަށް އުނދަގޫކުރުމާ ގުޅޭ ވާހަކަތައް ކަމަށް ވެސް އެމަނިކުފާނު ވިދާޅުވިއެވެ.
“އަޅުގަނޑުމެންނާ ވާދަވެރި އިންތިހާބުގައި ވާދަކުރާ ބޭބޭފުޅުން ވެސް ވިދާޅުވޭ މިހާތަނަށް ކުރި އުނދަގުލަކީ ކޮބާހޭ. ނޫނީ މާދަމާ ތިމަންނަމެން އިންތިހާބުކޮށްގެން ކޮބާހޭ ކުރާނެ އުނދަގޫތަކަކީ. ދަންނަވާލަން ބޭނުންވާނީ މިއަދު ޕޯޑިއަމްތަކުގައި އެވާހަކަ އެ ދައްކަނީ ސަރުކާރާ އެއްބާރުލުން ދީގެންތޯ. ސަރުކާރުގެ ސިޔާސަތަކަށް ތާއީދުކޮށްގެންތޯ،”
މިހާރު އެމްޑީޕީއަށް ނިސްބަތްވާ ކައުންސިލަރުން އަމަލުކުރަމުންދާގޮތާއި އެ ޕާޓީގެ ކަންކަން ހުރިގޮތަށް ބަލާއިރު، އެ ބޭފުޅުން ކައުންސިލަށް އިންތިހާބުވެއްޖެނަމަ، ސަރުކާރަށް ޖެއްސުންކޮށް އުނދަގޫކުރާނެކަން ސާފުވާ ކަމަށް ވެސް ނައިބު ރައީސް ވިދާޅުވިއެވެ.
“އެހެންވީމަ މީގެއިން ވެސް އެބަދޭހަވޭ އަޅިގަނޑުމެންނަށް އެބަ ޔަގީންވޭ އެއިން ބޭފުޅަކު އިންތިހާބުވެއްޖެ ނަމަ، ސަރުކާރާ ސީދާ އިދިކޮޅަށްކަން އެބޭފުޅުން މަސައްކަތް ކުރައްވަމުން ގެންދަވާނީ،”
ނައިބު ރައީސްގެ ވާހަކަފުޅުގައި ރިޔާސީ އިންތިހާބާއި މަޖލިސް އިންތިހާބު އެއް ދުވަހެއްގައި ބޭއްވުމުގެ މުހިންމުކަމުގެ މައްޗަށް ވެސް އަލިއަޅުވައިލެއްވިއެވެ. އަދި އެއީ މީގެކުރިން އެމްޑީޕީގެ އިސްވެރިން ވެސް ތާއީދުކޮށް ވަކާލާތު ކުރެއްވިކަމެއްކަން އެމަނިކުފާނު ފާހަގަކުރެއްވިއެވެ.
ކިޔުންތެރިންގެ ހިޔާލު