ނުަރައްކާތެރިކޮށް އެއްގަމު އުޅަނދު ދުއްވައިގެން މީހުންނަށް ގެއްލުން ލިބޭ ހާލަތްތަކުގައި ޖަލު ހުކުމް އަންނަގޮތަށް ހެދުމަށް އެއްގަމު ދަތުރުފަތުރާ ބެހޭ އާ ބިލެއް ސަރުކާރުން ރައްޔިތުންގެ މަޖިލީހަށް ހުށަހަޅައިފިއެވެ.
ސަރުކާރުގެ ފަރާތުން މި ބިލް މަޖިލީހަށް ހުށަހެޅުއްވީ ކުރެންދޫ ދާއިރާގެ މެންބަރު ޝާމިން ހަބީބެވެ.
އެ ބިލްގައިވާގޮތުން ފަރުވާކުޑަކޮށް ނުވަތަ ނުރައްކާތެރިކޮށް އެއްގަމު އުޅަނދު ދުއްވުމަކީ ޖިނާއީ ކުށެކެވެ.
އެފަދަ ގޮތަކަށް ދުއްވައިގެން މީހަކު މަރުވެއްޖެ ނަމަ 20 އަހަރަށް ޖަލަށް ލުމަށް ހުކުމް ކުރެވޭނެއެވެ.
އެފަދަ ގޮތަކަށް ދުއްވައިގެން މީހަކަށް ބޮޑު އަނިޔާއެއް ލިބިއްޖެ ނަމަ 10 އަހާރައި 15 އަހަރާއި ދެމެދުގެ މުއްދަތަކަށް ޖަލަށް ލުމަށް ހުކުމް ކުރެވޭނެއެވެ.
އެފަދަ ގޮތަކަށް ދުއްވައިގެން މީހަކަށް އެއްވެސް ވަރެއްގެ އަނިޔާއެއް ލިބިއްޖެނަމަ 5 އަހާރައި 10 އަހަރާ ދެމެދުގެ މުއްދަތަކަށް ޖަލަށް ލުމަށް ހުކުމް ކުރެވޭނެއެވެ.
އެފަދަ ގޮތަކަށް ދުއްވައިގެން މީހަކަށް އަނިޔާއެއް ނުވިއަސް އެކްސިޑެންޓެއް ވެއްޖެނަމަ 25،000ރ. އާއި 100،000ރ.އާ ދެމެދުގެ އަދަދަކަށް ޖޫރިމަނާ ކުރެވޭނެ ކަމަށް ވެސް އެ ބިލްގައިވެއެވެ.
ކުށްކުރި މީހާއަށް އެއްގަމު އުޅަނދު ދުއްވުމުގެ ލައިސެންސް އޮތުމުގެ ހައްގު އަތުލެވޭ ހާލަތްތަކެއް ވެސް އެ ބިލްގައި ހިމަނާފައިވެއެވެ. އެގޮތުން ލައިސެންސެއް އޮތް ނަމަ ބާތިލްކުރެވޭނެއެވެ. އަދި ލައިސެންސެއް ނެތް ނަމަ ލައިސެންސަށް އެދި ހުށަހެޅުން މަނާވާނެއެވެ.
މީގެއިތުރުން ވެސް މިފަދަ މައްސަލަތަކުގައި އަމަލުކުރާނެ އިތުރު ގޮތްތައް ތަފްސީލީ ގޮތެއްގައި އެ ބިލްގައި ބަޔާންކޮށްފައިވެއެވެ.
ކިޔުންތެރިންގެ ހިޔާލު