ޓްރެފިކްގެ ގާނޫނުތަކާ ހިލާފަށް އަމަލުކުރުމުގެ ސަބަބުން ކުރާ ޖޫރިމަނާ ނުދައްކާ އުޅަނދު ފަހަރު ބޫޓުކޮށް، (ތަޅު އަޅުވައި) ހިފެހެއްޓުުމުގެ ބާރު ފުލުހުންނަށް ދޭގޮތަށް އެއްގަމު ދަތުރު ފަތުރުގެ ބިލް ރައްޔިތުންގެ މަޖިލީހަށް ހުށަހަޅައިފިއެވެ.

އާ ގާނޫނެއް އެކުލަވާލުމުގެ ގޮތުން ސަރުކާރުގެ ފަރާތުން މި މިބިލް ރައްޔިތުންގެ މަޖިލީހުގެ މިއަދުގެ ޖަލްސާއަށް ހުށަހެޅުއްވީ ކުރެންދޫ ދާއިރާގެ ޕީއެންސީ މެންބަރު މުހައްމަދު ޝާމިން ހަބީބެވެ.

ބިލްގައިވާގޮތުން ތްރެފިކް ޖޫރިމަނާގެ އަދަދު 5،000 ރުފިޔާ އަށް ވުރެ ބޮޑުވެއްޖެ ނަމަ ޖޫރިމަނާގެ ފައިސާ ދައްކާ ހަލާސްކުރަންދެން، އެ ޖޫރިމަނާއާ ގުޅޭ އުޅަނދު ފުލުހުން ބޫޓް ކުރަންވާނެއެވެ.

އުޅަނދެއް ބޫޓްކުރާތާ 72 ގަޑިއިރު ތެރޭގައި ޖޫރިމަނާ ނުދައްކައިފި ނަމަ، އެ އުޅަނދެއް ފުލުހުންގެ ބެލުމުގެ ދަށަށް ގެންދަން ޖެހޭނެ ކަމަށާއި އުޅަނދު އޭގެ ވެރިފަރާތަށް އަނބުރާ ދޫކުރެވޭނީ ޖޫރިމަނާ ދައްކައި ނިންމުމުން ނުވަތަ އެ ދައްކާނެ ގޮތަކާ މެދު އެއްބަސްވުމުން ކަމަށް މި ބިލްގައި ވެއެވެ.

މީގެ އިތުރުން ވެސް އުޅަނދުތައް ފުލުހުންގެ ބެލުމުގެ ދަށަށް ގެންދެވޭނެ ހާލަތްތައް ބިލުގައި ބަޔާންކުރެއެވެ.

އޭގެ ތެރޭގައި ގަަވައިދާ ހިލާފަށް ޕާކްކޮށްފައި ހުރުމާއި އުޅަނދެއް ޓޯކުރެވިދާނެ ކަމަށް ގާނޫނުގެ ދަށުން ހަދާ ގަވައިދުގައި ބަޔާން ކުރާ ހާލަތްތައް ހިމެނެއެވެ.

ފުލުހުން ހިފަހައްޓާ އުޅަނދަކާ އޭގެ ވެރިފަރާތުން ހަވާލު ނުވެ އެއް މަސް ވެއްޖެ ނަމަ، އެ އުޅަނދުގެ މައުލޫމާތު ގެޒެޓްކޮށް ފުލުހުން އެކަން އާންމުކުރަން ޖެހޭނެ ކަމަށާއި އޭގެ ފަހުން 60 ދުވަހުގެ މުހުލަތެއް ވެރިފަރާތަށް ދޭން ޖެހޭނެ ކަމަށްވެސް ބިލްގައިވެއެވެ.

އެ މުއްދަތުގައި އުޅަނދު ވެރިފަރާތުން ހަވާލު ނުވެއްޖެ ނަމަ، އުޅަނދު ނައްތާލުން ނުވަތަ ނީލަން ކިޔުމުގެ އިހްތިޔާރު މި ބިލުން ފުލުހުންނަށް ވަނީ ދީފައެވެ.