އިސްތިއުމާރީ އިސްރާއީލު ސިފައިން މިއަދުވެސް ޣައްޒާއަށް ބޮންއަޅައި 3 މީހުން ޝަހީދު ކޮށްލައިފިއެވެ.
އިސްތިއުމާރީ ޓެރަރިސްޓުން މިއަދު ބޮން އަޅާފައިވަނީ ޣައްޒާގެ ދެކުނުން ޚާން ޔޫނިސްއަށެވެ.
ޚާން ޔޫނިސްގެ އިތުރުން، ޣައްޒާގެ އުތުރުން ގާޒާ ސިޓީގެ ޒައިތޫން އަވަށަށްވެސް ޓެރަރިސްޓުން މިއަދު ވަރުގަދަ ވައިގެ ހަމަލާތަކެއް ދީފައި ވެއެވެ.
ބޮން އެޅުމުގެ އިތުރުން، ޚާން ޔޫނިސްއާއި، ގާޒާ ސިޓީގައި އިސްތިއުމާރީ ސިފައިން ކޮންޓްރޯލް ކުރާ ސަރަހައްދުގެ ތެރޭގައި ކޮޅަށް ހުރި ހުރިހާ ގެތަކާއި، އިމާރާތްތަކެއް ގޮއްވަމުން އެބަ ގެންދެއެވެ.
ހަމަލާތައް ހުއްޓާލުމަށް ހަމާސްއާއެކު ވެފައިވާ އެއްބަސްވުމާ ޚިލާފްވެ، އިސްތިއުމާރީ ސިފައިން ކެނޑިނޭޅި ގެންދަނީ ޣައްޒާއަށް ވައިގެ މަގުންނާއި، އެއްގަމުމަގުން ހަމަލާދީ އާންމުން ޝަހީދު ކުރަމުންނެވެ.
ހަމަލާތައް ހުއްޓާލުމަށް ވެފައިވާ އެއްބަސްވުމުގެ ފުރަތަމަ ފިޔަވަހީގައި ކުރަން އިސްރާއީލުން އެއްބަސްވި ގިނަ ކަންކަން ކޮށްފައި ނުވާއިރު، ހަމާސްއިން ދަނީ އެމީހުން ކުރަން އެއްބަސްވި ހުރިހާ ކަމެއް ކުރަމުންނެވެ.
ހަމަލާތައް ހުއްޓާލުމުގެ ފުރަތަމަ ފިޔަވަހި ނިމެންދާއިރު، އެމެރިކާއިން މަސައްކަތް ކުރަމުންދަނީ ދެވަނަ ފިޔަވައްސަށް ދިއުމަށެވެ.
އެކަމަކު، އިސްތިއުމާރީ އިސްރާއީލުގެ މުޖުރިމު ނަތަންޔާހޫ ގެންދަނީ، ދެވަނަ ފިޔަވައްސަށް ދިއުމަށް އޭނާ ދެކޮޅުކަން ފާޅުގައި އިޝާރާތް ކުރަމުންނެވެ.
ޣައްޒާއަށް ބައިނަލްއަގްވާމީ ސިފައިންގެ ފައުޖެއް ފޮނުވަން އދގެ ސަލާމަތީ މަޖިލީހުގައި މާދަމާ ވޯޓު ނަގަން ތައްޔާރު ވަމުންދާއިރު، މާދަމާގެ ވޯޓާއެކު އެމެރިކާގެ ރައީސް ޑޮނަލްޑް ޓްރަމްޕްގެ ޣައްޒާ ޕްލެންވެސް އދއިން އެންޑޯޒްވެގެން ދާނެއެވެ.
އެކަމަކު، ސަލާމަތީ މަޖިލީހުގައި ހިމެނެ ދާއިމީ މެމްބަރު ގައުމުތައް ކަމަށްވާ ރަޝިޔާ، ޗައިނާއިން އެމެރިކާގެ ޕްލެނާ ދެކޮޅު ހަދަމުން ގެންދާއިރު، އަރަބި ބައެއް ގައުމުތަކުންވެސް ގެންދަނީ ދެކޮޅު ހަދަމުންނެވެ. މައިގަނޑު ސަބަބަކީ، ޣައްޒާގައި ވެރިކަންކުރަން އެމެރިކާއިން ހުށަހަޅާފައިވާ ބޯޑުގެ މައްސަލައެވެ.
ކިޔުންތެރިންގެ ހިޔާލު