ދ. ބަނޑިދޫގައި މިފްކޯއިން ޤާއިމުކުރި 30 ޓަނުގެ އައިސްޕްލާންޓާއި 50 ޓަނުގެ އައިސް ސްޓޯރޭޖް ފެސިލިޓީ ރަސްމީކޮށް ހުޅުވައިފިއެވެ.
ބަނޑިދޫގައި ބޭއްވި ޚާއްސަ ރަސްމިއްޔާތެއްގައި މި ތަން ހުޅުވައިދެއްވީ މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމެވެ.
މި އައިސްޕްލާންޓަކީ ސަރުކަރުން 11 ރަށެއްގައި އައިސް ޕްލާންޓް ޤާއިމުކުރުމަށް ހިންގާ މަޝްރޫއުގެ ދަށުން ކުރިއަށް ގެންދިޔަ މަޝްރޫއެކެވެ. މި އައިސްޕްލާންޓް ތަރައްޤީކޮށްފައިވަނީ މިފްކޯއިންނެވެ.
މި ރަސްމިއްޔާތުގައި ވާހަކަފުޅުދައްކަމުން މަސްވެރިކަމާއި ބެހޭ ވަޒީރު އަޙްމަދު ޝިޔާމް ވިދާޅުވީ ބަނޑިދޫގައި ހުޅުވިގެން ދިޔަ އައިސްޕްލާންޓަކީ އެންމެ ކުރު މުއްދަތުގެ ތެރޭގައި ހުޅުވިގެންދިޔަ އައިސް ޕްލާންޓުކަމަށެވެ.
ވަޒީރު ވިދާޅުވީ މަސްވެރިކަމުގެ ސިނާއަތުގައި ހުރި ގޮންޖެހުންތައް ހައްލުކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގިނަ މަސައްކަތްތަކެެއް ކުރަމުންދާކަމަށެވެ. އެގޮތުން މަސްވެރިންނަށް ދިމާވެފައިވާ އައިސް ލިބުމުގެ ދަތިކަން ހައްލުކުރުމަށް ޚާއްސަ އިސްކަމެއްދީގެން މަސައްކަތް ކުރައްވަމުންދާކަން ވަޒީރު ވިދާޅުވިއެވެ.
މި ސަރުކާރު އައިއިރު ގިނަ އައިސްޕްލާންޓުތައް ހުރީ ބޭނުން ނުކުރެވޭ ހާލަތުގައިކަން ފާހަގަކުރައްވާ ވަޒީރު ވިދާޅުވީ، މިފްކޯއާއި އައިސް ޕްލާޓްތައް ހަވާލުކޮށް މަސައްކަތް ކުރެވެން ފެށުމުން އައިސް ޕްލާންޓުތައް އަނބުރާ އޮޕްރޭޝަނަށް ގެނެވިފައިވާކަމަށެވެ.
“މިފްކޯއިން ދަނީ ހުއްޓިފައި ހުރި އައިސް ޕްލާންޓުތައް އަދި އަލަށް ގާއިމް ކުރެވޭ އިސްޕްލާންޓުވެސް ވަރަށް އަވަސްކޮށް ނިންމަމުން. އަދި މަސްވެރިން ބޭނުންވާ އެކި ކަންކަން މިފްކޯއިން ދަނީ ހައްލުކޮށްދެއްވަމުން.” ވަޒީރު ވިދާޅުވިއެވެ.
މި ރަސްމިއްޔާތުގައި ވާހަަކަދައްކަމުން މިފްކޯގެ ސީއީއޯ ފަރުހަތު ޝަހީރު ވިދާޅުވީ މިފްކޯގެ ބެލުމުގެ ދަށުގައި ހުރި އައިސްޕްލާންޓްތައް ބެލުމުގެ ކަންކަން ވަރަށް ގާތުން ބަލާނެކަމަށެވެ. މި ހުޅުވޭ އައިސްޕްލާންޓުތަކުގެ ސަބަބުން ހުރިހާ ވައްތަރެއްގެ މަސްވެރިކަން ކުރާ ފަރާތްތަކަށް، އެ ފަރާތްތަކުން ބާނާ މަސްތާޒާ ކަމާއެކު ބެހެއްޓޭނެ މަގު ތަނަވަސްވެގެންދާނެކަމަށް ފަރުހަތު ވިދާޅުވިއެވެ.
“ހުރިހާ ވައްތަރެއްގެ މަސްވެރިކަން ކުރާ ފަރާތްތަކުން މި ބާނާ މަސް ތާޒާކަމައެކު ގެންދެވޭނެ. އަޅުގަނޑުގެ އުންމީދަކީ ރިސޯޓުތަކަށް ނޫނީ އެހެން ތަންތައްވެސް ގެންދާ މަސް މި އައިސް ބޭނުންކޮށްގެން ތަާޒާކަމާއެކު ގެންދިޔުން.” ފަރުހަތު ވިދާޅުވިއެވެ.
މި އައިސްޕްލާންޓްތަކަކީ ރައީސުލްޖުމްހޫރިއްޔާގެ ވަޢުދުފުޅުތަކުގެ ތެރޭގައި ހިމެނޭ، “މަސްވެރިންނަށް ފަސޭހައިން އައިސް ލިބޭނެ އިންތިޒާމު ހަމަޖައްސައިދިނުން” މި ވަޢުދުފުޅު ފުއްދެވުމުގެ ގޮތުން ކުރެވުނު މަސައްކަތެކެވެ. ބަނޑިދޫއާއި މީދޫގައި ހުޅުވުނު އައިސްޕްލާންޓްތަކުގެ ސަބަބުން އެ ސަރަޙައްދުގެ މަސްވެރިންނަށް ބޮޑެތި ފަސޭހަތަކެއް ލިބިގެންދާނެކަން މަސްވެރިކަމާބެހޭ ވުޒާރާއިން ފާހަގަކުރައްވައެވެ.
ކިޔުންތެރިންގެ ހިޔާލު