އިސްތިއުމާރި ޓެރަރިސްޓުން ބޮންއަޅައި ވައްޓާލާފައިވާ ގެތަކާއި، އިމާރާތްތަކުގެ ދަށުން 151 މީހެއްގެ ހަށިގަނޑު، ސިވިލް ޑިފެންސް ޓީމުތަކުން ހޯދައިފިއެވެ.
ހަނގުރާމަ ހުއްޓާލުމުގެ އެއްބަސްވުމަށް އަމަލު ކުރަން ފަށައި، އިސްތިއުމާރީ ސިފައިން ފައިބައިގެން ދިޔަ ސަރަހައްދުތަކަށް ޓީމުތައް ގޮސް މިހާރު ވަނީ މަސައްކަތް ފަށާފައެވެ.
އެގޮތުން، އެމްބިއުލެންސާއި، ސިވިލް ޑިފެންސް ޓީމުތައް އެމީހުންގެ އަތުގައި ހުރި ވަސީލަތްތަކާއެކު ގެންދަނީ ގާފުނި ތަކުގެެ ދަަށުވެ މަރުވެފައިވާ މީހުންގެ ހަށިތައް ހޯދުމުގެ މަސައްކަތް ކުރަމުންނެވެ.
ވައްޓާލާފައިވާ ގެތަކާއި، އިމާރާތްތަކުގެ ދަށުވެ އެތައްހާސް ބަޔަކު ގެއްލިފައި ވެއެވެ.
އަދި ހަމަލާތަކުގައި މަރުވެ އެތައް ބައެއްގެ ހަށިތައް ޣައްޒާގެ އުތުރުގެ މަގުތައްމަތީގައިވެސް އެބަ ހުރި ކަމަށް، ޣައްޒާ ހެލްތު މިނިސްޓްރީން ބުނެއެވެ.
އިސްތިއުމާރީ ޓެރަރިސްޓުން ކެނޑިނޭޅި ބޮން އަޅަމުން ދިއުމާއި، ބޮޑުބަޑީގެ ހަމަލާތައް ދެމުން ދިއުމުގެ ސަބަބުން މީހުން ސަލާމަތް ކުރާ ޓީމުތަކަށް، ގެއްލޭ މީހުން ހޯދުމުގެެ މަސައްކަތެއް ނުކުރެވެއެވެ. ޚާއްސަކޮށް ޣައްޒާގެ އުތުރުގައި އެއްވެސް ކަމެއް ނުކުރެވުނެވެ.
ބޮންއެޅުން ހުއްޓާލައި އިސްތިއުމާރީ ސިފައިން ފަހަތަށް ޖެހުނުތާ 24 ގަޑިއިރު ނުވަނީސް، ޓީމުތަކުން މިވަނީ 151 މީހެއްގެ ހަށިގަނޑު ހޯދައި ހޮސްޕިޓަލްތަކަށް ގެންގޮސްފައެވެ.
އަދި ޒަޚަމްގެ ހާލަތުގައި ތިބި 72 މީހަކުވެސް ހޮސްޕިޓަލްތަކަށް ގެންގޮސްފައި ވެއެވެ.
2023 ވަނަ އަހަރުގެ އޮކްޓޫބަރުމަހުގެ 7 ވަނަ ދުވަހުން ފެށިގެން އިސްތިއުމާރީ އިސްރާއީލުން ޣައްޒާގެ އާންމުންނާ ދެކޮޅަށް ފެށި ހަނގުރާމައިގައި ޝަހީދުކޮށްލި ކަމަށް ރެކޯޑް ކުރެވުނު މީހުންގެ އަދަދު މިހާރުވަނީ 67،682 އަށް އަރާފައެވެ. ޝަހީދުކޮށްލި މީހުންގެ 70 އިންސައްތައަކީ ކުޑަކުދިންނާއި އަަންހެނުންނާއި، އުމުރުން ދުވަސްވީ މީހުންނެވެ.
ހަމަލާތަކުގައި ޒަޚަމްވި މީހުންގެެ އަދަދުވަނީ 170 ހާހަށްވުރެ މައްޗަށް ގޮސްފައެވެ. ޒަޚަމްވި މީހުންގެ ބޮޑު ނިސްބަތަކީވެސް ކުޑަކުދިންނާއި އަންހެނުންނެވެ.
ބޮޑެތި ޒަޚަމުގެ ސަބަބުން އެތައްހާސް ކުދީންނެއްގެ އަތްފައި ވަނީ ބުރިކޮށްލާފައެވެ.
ކިޔުންތެރިންގެ ހިޔާލު