ގާޒާ ސިޓީގައި ތިބި މިލިއަނަކަށްވުރެ ގިނަ މީހުން ގެދޮރު ދޫކޮށް ރަށުން ފައިބައިގެން ދިއުމަށް 48 ގަޑިއިރުގެ މުހުލަތު ދީފިއެވެ.
އިސްތިއުމާރީ އަސްކަރިއްޔާއިން އެކްސްގައި ކުރި ޕޯސްޓެއްގައި ބުނެފައިވަނީ، ގާޒާ ސިޓީގެ އާންމުން ފައިގެން ދިއުމަށް މިހާރު މަގެއް ހުޅުވާލާފައިވާ ކަމަށާއި، އެ މަގު ހުޅުވާލާފައިވަނީ 48 ގަޑިއިރަށް ކަމަށެވެ.
އެއީ، ސަލާހުއްދީން މަގެވެ. އެ މަގު ހުޅުވާލާފައިވަނީ ހުކުރު ދުވަހާ ހަމައަށެވެ.
އަދި އާންމުން ރަށުން ފައިބައިގެން ޣައްޒާގެ ދެކުނަށް ދިއުމަށްވެސް އަންގާފައި ވެއެވެ.
އިސްތިއުމާރީ ސިފައިން ގާޒާ ސިޓީގެ އާންމުން ޖަމާކުރަމުން ގެންދަނީ ޣައްޒާގެ ދެކުނުން އަލް މަވާސީ ސަރަހައްދަށެވެ. އެއީ، މިހާރުވެސް މީހުންނާއިގެން ތޮއްޖެހިފައިވާ ސަރަހައްދެކެވެ.
އިސްތިއުމާރީ ޓެރަރިސްޓުން މިހާރުވަނީ އެއްގަމުމަގުންވެސް ގާޒާ ސިޓީއަށް ވަދެގެންފައެވެ.
އެއްގަމުމަގުން އަރައިގަތް ޓެރަރިސްޓުން ބޮޑުބަޑީގެ ހަމަލާތައް ދެމުންގެންދާއިރު، ޓެރަރިސްޓު ސިފައިން ގެންދަނީ އާންމުންގެ ގެތައްވެސް ރެއިޑްކުރަމުންނެވެ.
އަދި އާންމުން ގިނައިން ދިރިއުޅޭ ސަރަހައްދުތަކަށް ވަދެގަނެ ބޮޑެތި ޖަރީމާތައްވެސް ހިންގަމުން ގެންދާ ކަމަށް ރިޕޯޓްތައް ބުނެއެވެ.
ނުވިތާކަށް، ޖެޓުތަކާއި، ޑްރޯންތަކުން ގާޒާ ސިޓީގެ އެކި އަވަށްތަކަށް ވަރުގަދައަށް ބޮންއަޅަމުން ގެންދާއިރު، އުސް އެތައް އިމާރާތެއްވެސް ގެންދަނީ ގޮއްވަމުންނެވެ.
އާންމުންގެ އަވަށްތަކާއި، ސްކޫލް އިމާރާތްތަކާއި، ހޮސްޕިޓަލްތަކަށްވެސް ހަމަލާދީ ސުންނާފަތި ކުރަމުން ގެންދެއެވެ.
މިއަދުވެސް ގާޒާ ސިޓީގައި ހުންނަ އަލް ރަންތީސީ ޗިލްޑްރަންސް ހޮސްޕިޓަލަށް ތިން ފަހަރަށް ބޮންއަޅާފައި ވާކަމަށް، ޣައްޒާ ހެލްތު މިނިސްޓްރީން ބުނެފައި ވެއެވެ.
އިސްތިއުމާރީ އަސްކަރިއްޔާއިން ބުނެފައިވަނީ، އެއްގަމުމަގުން ސިފައިން ވަދެގަތީ ގާޒާ ސިޓީ ހިފުމަށް ފަށާފައިވާ “އޮޕަރޭޝަންގެ” ދެވަނަ ފިޔަވަހީގެ ދަށުން ކަމަށެވެ.
އިސްތިއުމާރީ ބާރުން މަސައްކަތް ކުރަމުން ގެންދަނީ ގާޒާ ސިޓީ ހިފައި، އެ ސިޓީ އިސްރާއީލުގެ ތަނަކަށް ހެދުމަށެވެ.
ކިޔުންތެރިންގެ ހިޔާލު