ޒަޔަނިސްޓުން ހަމަލާދީ ވޭތުވެދިޔަ 24 ގަޑިއިރުގެ ތެރޭގައި ޣައްޒާއިން ޝަހީދުކޮށްލި މީހުންގެ އަދަދު 111 އަށް އަރައިފިއެވެ.
މީގެތެރެއިން 91 މީހުންނަކީ އިންސާނީ އެހީ ބަހާ ޕޮއިންޓްތަކަށް އެއްޗެއް ހޯދަން ގޮސް ތިއްބައި ބަޑިޖަހައި ޝަހީދުކޮށްލި މީހުންނެވެ.
އެހީ ހޯދަން ގޮސް ތިއްބައި ހަމަލާދީގެންނާއި އަދި ޣައްޒާގެ ރަށްތަކަށް ވޭތުވެދިޔަ 24 ގަޑިއިރުގެ ތެރޭގައި ދިން ހަމަލާތަކުގައި 111 މީހުން ޝަހީދުވުމުގެ އިތުރުން، ޒަޚަމްވި މީހުންގެ އަދަދު 820 އަށް އަރާފައިވާ ކަމަށް ޣައްޒާ މީޑިއާ އޮފީހުން ބުނެފައި ވެއެވެ.
މިއަދުވެސް މިހާތަނަށް ޣައްޒާއިން 34 މީހުން ޝަހީދުކޮށްލާފައި ވެއެވެ. އެހީ ހޯދަން ގޮސް ތިއްބައި ބަޑިޖަހައި 15 މީހުން ޝަހީދުކޮށްލާފައި ވެއެވެ.
މިހާރުވެސް ގެންދަނީ މުޅި ޣައްޒާއަށް ވަރުގަދަ ހަމަލާތަކެއް ދެމުންނެވެ.
ޣައްޒާ ހެލްތު މިނިސްޓްރީން ޓެލެގްރާމް މެދުވެރިކޮށް އާންމުކުރި މައުލޫމާތުގައި ބުނެފައިވަނީ، 2023 ވަނަ އަހަރު އޮކްޓޯބަރު މަހުން ފެށިގެން ޒަޔަނިސްޓު ސިފައިން ޣައްޒާއިން މިހާތަނަށް 60،249 މީހުން ޝަހީދުކޮށްލާފައިވާ ކަމަށެވެ.
އިންސާނީ އެހީ ބަހަން ކަމަށްބުނެ ޖަހާފައިވާ ޕޮއިންޓްތަކުގައި ބަޑިޖަހައި، މެއިމަހުގެ 27 ވަނަ ދުވަހުން ފެށިގެން މިހާތަނަށް 1،330 މީހުން ޝަހީދުކޮށްލާފައި ވެއެވެ. އެހީ ހޯދަން ގޮސް ތިއްބައި ބަޑިޖަހައި ޒަޚަމްކޮށްލި މީހުންގެ އަދަދު 8،818 އަށް އަރާފައި ވެއެވެ.
ކާނޭ އެއްޗެއް ނުލިބި ޣައްޒާއިން މީހުން ބަނޑަށްމަރުވާން ފަށާފައިވާއިރު އަދަދު މިހާރުވަނީ 154 އަށް އަރާފައެވެ. އޭގެތެރެގައި 89 ކުޑަކުދިންވެސް ހިމެނެއެވެ.
ކިޔުންތެރިންގެ ހިޔާލު