ތައިލެންޑާއި ކެމްބޯޑިއާގެ ބޯޑަރުގައި ފަސް ދުވަސް ވަންދެން ހިނގި ހަނގުރާމަ ހުއްޓާލުމަށް އެއްބަސްވެއްޖެއެވެ.
މި ހަނގުރާމައިގައި މަދުވެގެން 33 މީހުން މަރުވެ، 10،000 މީހުން ގެދޮރު ދޫކޮށް ގޮސްފައިވެއެވެ.

“މިއީ ހާލަތު ގޯސްވެ ސުލްހަ އާއި ރައްކާތެރިކަން އަލުން ގާއިމް ކުރުމަށް އެޅި މުހިންމު ފިޔަވަޅެއް،” މެލޭޝިއާގެ ބޮޑުވަޒީރު އަންވަރު އިބްރާހިމް ވިދާޅުވިއެވެ.

މި އެއްބަސްވުމަށް ފުރަތަމަ ހުށަހެޅި ހުށަހެޅުމަށް ތައިލެންޑުން ވަނީ ދެކޮޅު ހަދައިފައެވެ. ނަމަވެސް ހަނގުރާމަ ނުހުއްޓެނީސް ޓެރިފްގެ މަޝްވަރާތައް ކުރިއަށް ނުދާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުނުމުން، އެ ގައުމުން ވަނީ މި ހުށަހެޅުމަށް އެއްބަސްވެފައެވެ.

ގަރުނުތަކެއް ވަންދެން ބޯޑަރު މައްސަލައާ ގުޅިގެން އެ ދެ ގައުމުގެ ދެމެދުގައި އުފެދުނު މައްސަލަތައް ބޮޑުވެ ހަނގުރާމައަކަށް ބަދަލުވީ މިދިޔަ މެއި މަހު ދެގައުމެއްގެ ދެމެދުގައި ހިނގި ކުރިމަތިލުމެއްގައި ކެމްބޯޑިއާގެ ސިފައިންގެ މީހަކު މަރުވުމުންނެވެ.

އެއްގަމު މަގުން ކެމްބޯޑިއާއަށް ދަތުރުކުރާ ރައްޔިތުންނާއި ފަތުރުވެރިންނަށް ތައިލެންޑުން ހުރަސްތަކެއް އަޅާފައިވާއިރު، ކެމްބޯޑިއާ އިން ވަނީ ތައިލެންޑުން ބައެއް ތަކެތި އެތެރެކުރުން މަނާކޮށްފައެވެ. މީގެ ތެރޭގައި މޭވާ، ކަރަންޓު އަދި އިންޓަނެޓްގެ ހިދުމަތް ހިމެނެއެވެ.

ކެމްބޯޑިއާގެ ލޯކަލް އައުޓްލެޓްތަކުން ވަނީ މެއި މަހުން ފެށިގެން އެ ގައުމަށް ނިސްބަތްވާ ލައްކައެއްހާ މަސައްކަތްތެރިން ތައިލެންޑުން އެނބުރި އައިސްފައިވާ ކަމަށް ރިޕޯޓު ކޮށްފައެވެ.

މިދިޔަ ހަފްތާގައި ހަނގުރާމައިގެ ހާލަތު އިތުރަށް ގޯސްވުމުގެ ސަބަބުން ތައިލެންޑުން ކެމްބޯޑިއާއާ އެކު ބޯޑަރު ހުރަސްކުރާ ބައެއް ތަންތަން ބަންދުކުރިއެވެ. އަދި އެ ގައުމުން ވަނީ ކެންބޯޑިއާގެ ސަފީރު ވަކިކޮށް، ސަފީރު އަނބުރާ އެ ގައުމަށް ގެނެސްފައެވެ.