ސިންގަޕޫރުގެ ސެންޓްރަލް ނާކޮޓިކްސް ބިއުރޯގެ ސީނިއަރ އޮފިސަރުންގެ ޓީމަކުން ފުލުހުންނަށް ސެޝަންތަކެއް ނަގައިދީފިއެވެ. މި ޓީމަކީ މަސްތުވާތަކެތީގެ މައްސަލަތަކުގެ އޮޕަރޭޝަންސް އަދި އިންވެސްޓިގޭޝަން ދާއިރާގެ ތަޖުރިބާހުރި ޓީމެކެވެ.
ޖުލައި 21 އިން 24 އަށް ކުރިއަށްގެންދިޔަ މި ސެޝަންތަކުގައި، ކޮންޓްރޯލް ޑެލިވަރީ އޮޕަރޭޝަންތަކާ ގުޅޭ މައުލޫމާތު ހިއްސާކޮށްފައިވެއެވެ. އަދި މަސްތުވާތަކެއްޗާ ބެހޭ މައްސަލަތަކުގެ ފައިސާއާ ގުޅުންހުރި މައްސަތައް ތަހުގީގުކުރާނެ ގޮތުގެ މުހިންމު މައުލޫމާތުތަކެއް ވެސް ހިއްސާކޮށްފައިވެއެވެ.
މި ސެޝަންތަކުގެ ތެރެއިން ކޮންޓްރޯލް ޑެލިވަރީ ސެޝަންގައި, ޑްރަގް އެންފޯސްމަންޓުގެ އޮޕަރޭޝަންސްގެ މުވައްޒަފުންގެ އިތުރުން ގޭންގު ކްރައިމް އެންފޯސްމަންޓުގެ މުވައްޒަފުންނާއި ކައުންޓަރ ނާކޮޓިކްސް އިންޓެލިޖެންސްގެ މުވައްޒަފުން ބައިވެރިވިއެވެ. ފައިނޭންޝިއަލް އިންވެސްޓިގޭޝަން ސެޝަންގައި, ޑްރަގް އެންފޯސްމަންޓުގެ އިންވެސްޓިގޭޝަން މުވައްޒަފުންނާއި އެނަލިސްޓުންގެ އިތުރުން، އިކޮނޮމިކް ކްރައިމްސް، ގޭންގު ކްރައިމް އެންފޯސްމަންޓް އަދި ކައުންޓަރ ނާކޮޓިކްސް އިންޓެލިޖެންސްގެ އިންވެސްޓިގޭޝަން އޮފިސަރުންނާއި އެނަލިސްޓުން ބައިވެރިވިއެވެ.
މީގެ އިތުރުން، ސިންގަޕޫރުގެ ސެންޓްރަލް ނާކޮޓިކްސް ބިއުރޯގެ ސީނިއަރ އޮފިސަރުންގެ ޓީމުން، ފުލުހުންގެ ޚިދުމަތުގެ ކަމާ ގުޅުންހުރި ބަހާއާއެކު މަޝްވަރާ ބައްދަލުވުމެއް ބާއްވާފައިވެއެވެ. ޖުލައި 21ވަނަ ދުވަހު ޝަހީދު އާދަމް ޙަލީމް ކްރިމިނަލް އިންވެސްޓިގޭޝަން ބިލްޑިންގގައި ބޭއްވި މި ބައްދަލުވުމުގައި، ސެންޓްރަލް އިންވެސްޓިގޭޝަން ކޮމާންޑް ހެޑް އެސިސްޓެންޓް ކޮމިޝަނާރ އޮފް ޕޮލިސް ޢަބްދުﷲ ޝަރީފްއާއި ޑްރަގް އެންފޯސްމަންޓުގެ ސީނިއަރ މެނޭޖްމަންޓް އަދި ކައުންޓަރ ނާކޮޓިކްސް އިންޓެލިޖެންސްގެ ވެރިން ބައިވެރިވެލެއްވިއެވެ.
މި ބައްދަލުވުމުގައި، މަސްތުވާތަކެއްޗާ ގުޅޭ މައްސަލަތަކުގައި ދިވެހި ފުލުހުންގެ ޚިދުމަތާއި ޑްރަގް އެންފޯސްމަންޓް އަދި ސެންޓްރަލް ނާކޮޓިކްސް ބިއުރޯ ގުޅިގެން ކުރެވިދާނެ މަސައްކަތްތަކާއި މި މަސައްކަތުގައި ދެފަރާތުން ފޯރުކޮށްދެވޭނެ އެހީތެރިކަމާ ގުޅޭގޮތުން މަޝްވަރާކުރެއްވިއެވެ. އަދި މަސްތުވާތަކެއްޗާ ގުޅޭ މައްސަލަތަކުގެ އޮޕަރޭޝަނަލް އަދި އިންވެސްޓިގޭޝަންއާ ގުޅޭ ތައުލީމާއި ތަމްރީނުގެ ފުރުސަތުތަކާ ގުޅޭގޮތުން ވެސް މަޝްވަރާކުރެއްވިއެވެ.
ކިޔުންތެރިންގެ ހިޔާލު