އިންޑިޔާގެ ބޮޑުވަޒީރު ނަރެންދުރަ މޯދީ ޖުލައި މަހުގެ 25 ވަނަ ދުވަހު ދެ ދުވަހުގެ ފުރަމާނަ ދަތުރުފުޅެއްގައި ރާއްޖެއަށް ވަޑައިގަތުމަށް ހަމަޖެހިއްޖެއެވެ.
ރައީސުލްޖުމްހޫރިއްޔާގެ އޮފީހުން ބުނެފައިވަނީ މޯދީގެ މި ދަތުރުފުޅަކީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ދަޢުވަތުފުޅަކަށް އެމަނިކުފާނު ކުރައްވާ ޒިޔާރަތެއް ކަމަަށެވެ. އެމަނިކުފާނު ރާއްޖެއަށް ވަޑައިގަންނަވަނީ ޖުލައި 25 އަދި 26 ވަނަ ދުވަހަށެވެ. މިއީ މޯދީ އިންޑިޔާގެ ބޮޑުވަޒީރުކަމުގެ ތިންވަނަ ދައުރަކާ ހަވާލުވެވަޑައިގެންނެވިފަހުން ރާއްޖެއަށް ކުރައްވާ ފުރަތަމަ ދަތުރުފުޅެވެ. މީގެ ކުރިން 2019 ވަނަ އަހަރު ބޮޑުވަޒީރުކަމުގެ ދެވަނަ ދައުރަކަށް އިންތިހާބުވެވަޑައިގަތުމަށްފަހު ރާއްޖެއަަށް މޯދީ ޒިޔާރަތްކުރެއްވިއެވެ. އެއީ އެ އަހަރުގެ ޖޫން މަހުއެވެ.
ރައީސް އޮފީހުން ބުނި ގޮތުގައި މޯދީގެ މި ދަަތުރުފުޅުގައި ރައީސް ޑރ.މުޢިއްޒާއި މޯދީ ބައްދަލުކުރައްވައި މަަތީ ފަންތީގެ މަޝްވަރާތަކެއް ކުރިއަށްގެންދަވާނެއެވެ. އެގޮތުން ދެ ގައުމުގެ ގުޅުމާ ގުޅޭ ކަންކަމުގެ އިތުރަށް ސަރަހައްދީ މައްސަލަތަކާމެދު މަޝްވަރާކުރެއްވުމަށް ހަމަޖެހިފައިވެއެވެ. އޭގެ އިތުރަށް މި ދަަތުރުފުޅުގައި އިންޑިޔާއާއި ރާއްޖެ ގުޅިގެން ކުރިއަށްގެންދިޔަ ބަައެއް މަޝްރޫއުތައް އިފުތިތާހުކުރެއްވުން އޮންނާނެއެވެ. އަދި ދެ ގައުމުގެ މަސްލަހަތު ހިއްސާވަނިވި އެކި ދާއިރާތަކުން ގުޅުން ބަދަހިކުރުމާ ގުޅޭ ފަހުމުނާމާތަކެއްގައި ދެ ގައުމުގެ ސަރުކާރުތަކުގެ މެދުގައި ސޮއިކުރެވިގެންދާނެއެވެ.
ރައީސް އޮފީހުން ފާހަގަކުރި ގޮތުގައި މޯދީގެ މި ޒިޔާރަތަކީ ރާއްޖޭގެ މިނިވަންކަމަށް 60 އަހަރު ފުރުމާއި، އިންޑިޔާއާއި ރާއްޖޭގެ މެދުގައި ޑިޕްލޮމެޓިކް ގުޅުން ގާއިމުކުރެވުނުތާ 60 އަހަރު ފުރުމުގެ ތާރީހީ މުނާސަބަތާ ދިމާވާ ޒިޔާރަތަކަށްވާތީ މިއީ ވަރަށް މުހިއްމު ތާރީހީ ޒިޔާރަތަކަށްވާނެއެވެ.
ރައީސް މުޢިއްޒު ވެރިކަމާ ހަވާލުވެވަޑައިގެން އިންޑިޔާއާއެކު މަޝްވަރާކުރައްވައި، ރާއްޖޭގައި ތިބި އެ ގައުމުގެ ސިފައިން އަނބުރާ ގައުމަަށް ގެންދިއުމަށް ދެ ގައުމުގެ މެދުގައި އެއްބަސްވުމެއް ގާއިމުކުރެވި، ސިފައިން ގެންގޮސްފައިވެއެވެ.
އޭގެ ފަހުން ރައީސްވަނީ އިންޑިޔާއަށް ފުރަމާނަ ދަތުރުފުޅެއްގައި ވަޑައިގެން، އެ ގައުމުގެ ރައީސް އަދި މޯދީއާވެސް ބައްދަލުކުރައްވާފައެވެ. އެ ބައްދަލުވުމުގައި ރާއްޖޭގެ ބޭރު ފައިސާގެ ރިޒާވްގެ ހާލަތު ރަނގަޅުކުރުމަށް ރިޒާވް ބޭންކް އޮފް އިންޑިޔާއިން 400 މިލިއަން ޑޮލަރުގެ ކަރަންސީ ސްވޮޕެއް ހަމަޖައްސައިދިނުމުގެ އެއްބަސްވުމުގައި ސޮއިކުރެވުނެވެ. އަދި އެހެނިހެން ބައެއް ދާއިރާތަކުން ދެ ގައުމުގެ މެދުގައި އޮތް އެއްބާރުލުންދިނުން އިތުރުކުރުމާއި ގުޅުން އިތުރަށް ބަދަހިކުރުމާ ގުޅޭ ފަހުމުނާމާތަކުގައި ސޮއިކުރެވުނެވެ.
ރައީސް ޑރ.މުޢިއްޒު ގެންދަވަނީ އިންޑިޔާއާއި ޗައިނާއާއި ދުނިޔޭގެ އެހެނިހެން ބޮޑެތި ބާރުތަކާއެކު ތިލަފަތްހަމަ ގުޅުމެއް ދަމަހައްޓަވަމުންނެވެ.
ކިޔުންތެރިންގެ ހިޔާލު