އދ. މާމިގިލިން ފީނަން ގޮސް އުޅުނު ކުއްޖާ ނިޔާވުމާ ގުޅިގެން ރައީސް ޑރ. މުހައްމަދު މުއިއްޒު ތައުޒިޔާ ވިދާޅުވެއްޖެއެވެ.

މާމިގިލި ކައިރިން ފީނަން ގޮސް އުޅުނު ހަތަރު ކުދިންގެ ތެރެއިން 15 އަހަރުގެ ކުއްޖަކު ގެއްލިގެން ފުލުހުންނަށް ރިޕޯޓު ކުރުމާ ގުޅިގެން އޭނާ ހޯދުމުގެ މަސައްކަތް ފުލުހުން ވަނީ ކޮށްފައެވެ.

އެ ކުއްޖާ ހޯދުމުގެ މަސައްކަތް ކުރަމުންދަނިކޮށް، އެ ކުއްޖާ ފެނުމާއެކު މާމިގިލި ސިއްހީ މަރުކަޒަށް ވަނީ ގެންގޮސްފައެވެ. ނަމަވެސް ސިއްހީ މަރުކަޒަށް ކުއްޖާ ގެންދިޔަ އިރުވެސް އޮތީ ނިޔާވެފައެވެ.

އެކްސްގައި ރައީސް މިއަދު ކުރެއްވި ޕޯސްޓެއްގައި ވިދާޅުވީ މޫދަށް ގޮސް އުޅެނިކޮށް އުމުރުން 15 އަހަރުގެ ކުޑަ ކުއްޖަކު ނިޔާވުމަކީ، ހިތާމަވެރި، ނުތަނަވަސް އިހުސާސްތަކެއް ކުރުވި ހިތްދަތި ހަބަރެއް ކަމަށެވެ.

އެ ހާދިސާގައި ނިޔާވި ލޫތު ބިން އަހުމަދަށް ސުވަރުގޭގެ ދާއިމީ ނިއުމަތް މިންވަރުކުރައްވައި، އެ އާއިލާއަށް ކެތްތެރިކަން ދެއްވުމަށް ދުއާ ދަންނަވާ ކަމަށް އެ މަނިކުފާނު ވިދާޅުވިއެވެ.