ނ. ފޮއްދޫ ބަނދަރު ތަރައްގީކުރުމުގެ އަމަލީ މަސައްކަތް އެމްޓީސީސީން މިއަދު ފަށައިފިއެވެ.
މިއީ ދައުލަތުގެ ބަޖެޓުން 49.77 މިލިއަން ރުފިޔާ ޚަރަދުކޮށްގެން ހިންގާ މަޝްރޫއެކެވެ.
މި މަޝްރޫއުގެ ތަފްސީލް
-
30,648 ކިއުބިކް މީޓަރުގެ ސަރަހައްދެއްގެ އާ ހާބަ ބޭސިން ފުންކުރާނެ
-
3,990 ކިއުބިކް މީޓަރުގެ ސަރަހައްދެއްގެ ނެރު ފުންކުރާނެ
-
145 މީޓަރުގެ ބޭރުތޮށި ލާނެ
-
165 މީޓަރުގެ ރިވެޓްމަންޓް ޖަހާނެ
-
130 މީޓަރުގެ އެއްގަމުތޮށި ލާނެ
-
125 މީޓަރު ދިގު 6 މީޓަރު ފުޅާ ޖެޓީއެއް ހަދާނެ
-
600 އަކަމީޓަރުގެ ޕޭވްމަންޓް ހަދާނެ
-
ނެރު ބައްތި އާއި ބަނދަރު ބައްތި ހަރުކުރާނެ
އެނގުން މުހިންމު – 504 މީހުންގެ އާބާދީއެއް ދިރިއުޅޭ ފޮއްދޫ ރައްޔިތުން އާއްމުކޮށް މަސައްކަތް ކުރަނީ ފަތުރުވެރިކަމުގެ ދާއިރާގަ އެވެ. އެގޮތުން، އެ ރަށުގައި 5 ގެސްޓްހައުސް މިވަގުތު ހިންގަ އެވެ.
“ނަމަވެސް، ބަނދަރެއް ނެތުމުގެ ސަބަބުން، ރަށަށް ޒިޔާރަތްކުރާ ފަތުރުވެރިންނާއި އެ ނޫން މީހުން ލަފާފުރުމަށް ބޭނުންކުރަނީ ހަމައެކަނި ހުޅަނގު މޫސުމުގައި ބޭނުންކުރެވޭ ޖެޓީއެކެވެ،” އެމްޓީސީސީން ނެރުނު ބަޔާނެއްގައިވެއެވެ.
“މިއަދު އަމަލީ މަސައްކަތް ފެށުނު ބަނދަރުގެ މަސައްކަތް ނިމުމާ އެކު ތަނަވަސް ބަނދަރެއް ލިބި، ރަށަށް އަންނަ ފަތުރުވެރިންނާއި އެ ނޫން މީހުންނަށް އެކަމުގެ ސަބަބުން ބޮޑެތި ފަސޭހަތަކެއް ލިބިގެންދާނެ.”
ސަރުކާރާއި ރައްޔިތުންގެ ހިއްސާ އޮންނަ އެމްޓީސީސީ އާ ވަނީ ތަރައްގީގެ ގިނަ މަޝްރޫއުތަކެއް ހަވާލުކޮށްފައެވެ. އެ ކުންފުނިން އަންނަނީ އެ މަސައްކަތް އަވަހަށް ނިންމުމަށްޓަކައި ކުރެވެން ހުރި މަސައްކަތްތައް ކުރަމުންނެވެ.
ކިޔުންތެރިންގެ ހިޔާލު