ނުކުޅެދުންތެރިކަން ހުންނަ ކުދީންނަށް ކިޔަވައިދޭ ސެން ޓީޗަރުން ލިބުމުގެ ދަތިކަން ހުރި ކަމަށާއި އެކަމަށްޓަކައި ސެން ޓީޗަރުން ތަމްރީނުކުރުމުގެ ޕްރޮގްރާމެއް މިއަހަރު ފެށިގެންދާނެ ކަމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވެއްޖެއެވެ.
މަތީ އަރުތަވެރިންގެ އިނާމުދިނުމުގެ ޖަލްސާތަކުގެ ތެރެއިން މިއަދު ހެނދުނުގެ ސެޝަންގައި ވާހަކަދައްކަވަމުން މިނިސްޓަރު ވިދާޅުވީ 600 އެއްހާ ސެން ޓީޗަރުން ބޭނުންވާ ކަމަށާއި 200 އެއްހާ ޕްރައިމަރީ ޓީޗަރުން ވެސް ބޭނުންވާ ކަމަށެވެ.
މެނިފެސްޓޯގައި ހިމަނާފައިވާ ގޮތަށް ޓީޗަރުން ތަމްރީނު ކުރުމުގެ ގައުމީ ޕްރޮގްރާމް މިދިޔަ އަހަރު ފަށާފައިވާ ކަމަށާއި އެގޮތުން މިއަހަރު ވެސް އިތުރު ޕްރޮގްރާމްތައް ފެށުމަށް މަސައްކަތް ކުރަމުން އަންނަ ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ މިއަހަރު ތެރޭގައި ރާއްޖޭގެ ހައި އެޑިއުކޭޝަން އިންސްޓިޓިއުޓްތަކާ ގުޅިގެން ސެން ޓީޗަރުން ތަމްރީން ކުރުމުގެ ހާއްސަ ޕްރޮގްރާމެއް ފަށާނެ ކަމަށެވެ.
ސެން ޓީޗަރުން ތަމްރީން ކުރުމުގެ ޕްރޮގްރާމެއް ފަށަން ނިންމަވާފައިވާކަން ރައީސް ޑރ. މުހައްމަދު މުއިއްޒު ވެސް މީގެ ކުރިން ވަނީ އިއުލާންކުރައްވައިފައެވެ.
ކިޔުންތެރިންގެ ހިޔާލު