މިދިޔަ އޭޕްރިލް މަހުގެ 18 ވަނަ ދުވަހު ހ. މިޓާޒްގޭގެ ފުރާޅުމައްޗަށް ހައްވާ ޔުމްނު ރަޝީދު ވެއްޓުނު މައްސަލައިގެ ތަހުގީގަށް ދޮގު ބަޔާން ދިން މައްސަލައިގައި ރައީސުލްޖުމްހޫރިއްޔާގެ އޮފީހުގެ އަންޑާ ސެކްރެޓަރީ ފޯ ޑިޖިޓަލް ސްޓްރެޓެޖީގެ މަގާމުގައި ހުންނެވި ދާއޫދު އަހުމަދު އެ މަގާމުން ވަކިކޮށްފިއެވެ.

ރައީސް އޮފީހުގެ ތަރުޖަމާނު ހީނާ ވަލީދު އެކްސްގައި މިރޭ ކުރެއްވި ޕޯސްޓެއްގައި ވިދާޅުވީ ޔުމްނު ވެއްޓުނު މައްސަލައިގައި ދާއޫދު ދޮގު ބަޔާނެއް ދީފައިވާ ކަމަށް ރިޔާސީ ކޮމިޝަންގެ ރިޕޯޓުގައި ފާހަގަކޮށްފައިވާތީ ދާއޫދު މަގާމުން ވަކިކުރައްވާފައިވާ ކަމަށެވެ.

އެ މައްސަލައިގައި ތުހުމަތުކުރެވޭ ރައުދު އަހުމަދުގެ ބޭބެ، ދާއޫދު ރިޔާސީ ކޮމިޝަނަށް ދިން ބަޔާނާއި ފުލުހުންނަށް ދިން ބަޔާނުގައި ތަފާތުތަކެއް ހުރި ކަމަށް ކޮމިޝަންގެ ރިފޯޓުގައި ވަނީ ފާހަގަކޮށްފައެވެ.

އޭގެ އިތުރުން އެއްވެސް މިނިސްޓަރަކަށް ގުޅާފައިނުވާނެ ކަމަށް ދާއޫދުގެ ބަޔާނުގައި ވިދާޅުވެފައިވީ ނަމަވެސް، ހޯމްލޭންޑް މިނިސްޓަރު އަލީ އިހުސާން ދެއްވި ބަޔާނުގައި ދާއޫދު ގުޅައި މެސެޖުކުރެއްވި ކަމަށް ވިދާޅުވިއެވެ.

ކޮމިޝަނުން ވަނީ ރައުދުއެކޭ އެއްވަރަށް ޔުމްނުއަށް އެހީތެރިކަން ފޯރުކޮށްނުދިނުމުގެ އިހުމާލު ދާއޫދުގެ ވެސް އޮންނާނެ ކަމަށް ބުނެފައެވެ.