ރާއްޖޭގެ ފުރަތަމަ އިސްލާމިކް މިނިސްޓަރު އަދި މަޝްހޫރު ދީނީ އިލްމުވެރިޔާ ޑރ. ޢަބްދުލްމަޖީދު ޢަބްދުލްބާރީ رحمه الله އަވަހާރަވީ ނޫން ކަމަށާއި، ޝަހީދުކޮށްލީ ކަމަށް ކުރީގެ ދާޚިލީ ވަޒީރު އަދި އަދާލަތު ޕާޓީގެ ރައީސް އިމްރާން އަބްދުﷲ މިއަދު ވިދާޅުވެއްޖެއެވެ.

ޑރ ޢިަބްދުލްމަޖީދު ރަޙިމަހުالله ގެ ކުއްލި މަރާ ގުޅިގެން މިއޮތް ހުރިހާދުވަހު ހިތުގައި އުފެދިފައި އޮތް ޝައްކު މިހާރު ޔަގީންވާ ހިސާބައް އަތުވެއްޖެއެވެ.
އާއެކެވެ، ޑޮކްޓަރ މަޖީދު ބަޔަކު ޝަހީދުކޮށްލީއެވެ.

— Imran Abdulla (@ShimranAb) June 14, 2025

ޝައިޚް އިމްރާން މިހެން ވިދާޅުވެފައިވާއިރު، ރާއްޖޭގެ ފުރަތަމަ އިސްލާމިކް މިނިސްޓަރ ޑރ. އަބްދުލްމަޖީދު އަބްދުލްބާރީ ދެމިއޮތުމުގެ އާލަމަށް ދަތުރު ކުރެއްވީ 22 މެއި 2018 ގައި އަވައްޓެރި ސްރީލަންކާގައި ހުންނަވަނިކޮށް ސްޓްރޯކެއް ޖެހިވަޑައި ގަތުމާ ގުޅިގެން ލަންކާގެ ހޮސްޕިޓަލެއްގެ އައިސީޔޫގައި ވެންޓިލޭޓަރުގައި ފަރުވާދެމުން ދަނިކޮށެވެ.

ޑރ. މަޖީދުގެ މަރާއި ގުޅިގެން ޝައިޚް އިމްރާން މިއަދު ވިދާޅުވީ، ޑރ. އަބްދުލްމަޖީދު ގެ ކުއްލި މަރާ ގުޅިގެން ގިނަ ދުވަސްތަކެއް ވަންދެން ހިތުގައި އުފެދިފައި އޮތް ޝައްކު މިހާރު ޔަގީންވާ ހިސާބަށް ގޮސްފައިވާ ކަމަށެވެ.

“އާއެކެވެ، ޑޮކްޓަރ މަޖީދު ބަޔަކު ޝަހީދުކޮށްލީއެވެ.” އޭނާ ލިޔުއްވާފައިވެއެވެ.

ރާއްޖޭގެ އެންމެ ފުރަތަމަ އިސްލާމިކް މިނިސްޓަރުގެ އިތުރުން، ޑރ. މަޖީދަކީ ރާއްޖޭގެ ދީނީ ޢިލްމުވެރިންތަކެއް އިސްކޮށް ތިއްބަވައިގެން އުފެއްދި އަދާލަތު ޕާޓީގެ އެއް ބާނީވެސް މެއެވެ.

އެމަނިކުފާނު އަބަދުވެސް ފާހަގަ ކުރެވިފައިވަނީ ޚުލްގުހެޔޮ، މަޑުމައިތިރި، އަޚްލާގު ރަނގަޅު އަދި ހަމައާއި އިންސާފަށް އަބަދުވެސް ވާހަކަފުޅު ދައްކަވަމުން ގެންދެވި ބޭފުޅެކެވެ.

ޑރ. މަޖީދުގެ ކުއްލި އަވަހާރަވުމާމެދު ޝައިޚް އިމްރާން ޝައްކު އުފައްދަވާފައި މިވަނީ، ޠައިބާ ޙައްޖު އުމްރާ ގްރޫޕްގެ އެންމެ އިސް ޝައިޚް އަދި ޚިދުމަތް ޖަމިއްޔާގެ މުއައްސިސް ފަޟީލަތުއްޝައިޚް އިބްރާހީމް ފަރީދު އަޙްމަދު رحمه الله މިމަހުގެ 9 ވަނަ ދުވަހު ކުއްލި ގޮތަކަށް އަވަހާރަ ވެފައިވާ ދަނޑިވަޅެއްގައެވެ.

ޢުމުރުފުޅުން 53 އަހަރުގެ ޝައިޚް ފަރީދު އަވަހާރަ ވެފައިވަނީ، ރާއްޖޭން މެލޭޝިއާއަށް ވަޑައިގެން އެއަރޕޯޓުގައި ހުންނަވަނިކޮށް ކުއްލިގޮތަކަށެވެ. ޝައިޚް ފަރީދު މެލޭޝިއާއަށް ވަޑައިގެންނެވީ ޙަލާލު ޓޫރިޒަމް ޕްރޮމޯޓް ކުރުމުގެ މަސައްކަތަށް ކަމަށް މަޢުލޫމާތު ލިބިފައިވެއެވެ.

ރާއްޖޭގެ މަޝްހޫރު ދެ ޢިލްމުވެރިން ޒުވާން ޢުމުރުފުޅުގައި ކުއްލި ގޮތަކަށް އަވަހާރަވެފައިވާއިރު، ރާއްޖޭގެ މަޝްހޫރު ދީނީ ޢިލްމުވެރިޔާ ޑރ. އަފްރާޝީމް ޢަލީ رحمه الله ވެސް މާލޭގައި ކަތިވަޅިއަކުން ޙަމަލާދީ ޝަހީދު ކޮށްލި ޙާދިސާގެ އަޑީގައި ތިބި ބަޔަކު މިއަދާ ހަމައަށްވެސް ހޯދިފައެއް ނުވެއެވެ.