މިފްކޯގެ ސީއީއޯ ފަރުހަތު ޝަހީރުގެ އެޑްވައިޒަރަކަށް އިގްތިސާދީ މާހިރު، އިބްރާހީމް އާތިފް ޝަކޫރު ހަމަޖައްސައިފިއެވެ.

އާތިފަކީ ވެސް މިފްކޯގެ ސީއީއޯކަން ކުރެއްވި ބޭފުޅެކެވެ. ކުރީގެ ރައީސް މައުމޫން އަބްދުލްގައްޔޫމާއި ކުރީގެ ރައީސް ޑރ. މުހައްމަދު ވަހީދު ހަސަން މަނިކުގެ ވެރިކަމުގައި އެ ކުންފުނީގެ ބައެއް މަގާމްތައް ފުރުއްވާފައެވެ. އޭގެތެރޭގައި ސޭލްސް އެންޑް މާކެޓިން މެނޭޖަރުގެ މަގާމާއި ޑެޕިއުޓީ ސީއީއޯގެ މަގާމް ހިމެނެއެވެ.

އާތިފަކީ ރާއްޖޭގައި ފާހަގަކޮށްލެވޭ ތަޖުރިބާކާރު އިގްތިސާދީ މާހިރެކެވެ. އިގްތިސާދީ ދާއިރާއާ ގުޅޭ ލިޔުންތައް ވެސް އޭނާ ލިޔުއްވާފައިވެއެވެ.

މި ސަރުކާރުގައި މިފްކޯގެ ސީއީއޯކަން ފުރުއްވި ބޭފުޅުންގެ ތެރޭގައި އަހްމަދު ޝަމާހު ރަޝީދު އާއި ސްވިޒަލެންޑްގެ ރައްޔިތެއް ކަމަށްވާ ޑރ. ވިޓާލީ ލުބިމޯވް ހިމެނެއެވެ.