ޕޮލިސް ކޮމިޝަނަރުގެ މަގާމަށް ކުރިމަތިލެއްވި ތިން ބޭފުޅުންގެ ވެސް ޝަރުތު ހަމަވާ ކަމަށް ޕޮލިސް ބޯޑުން ނިންމައިފިއެވެ.
ޕޮލިސް ކޮމިޝަނަރުގެ މަގާމު ހުސްވުމުން، އެ މަގާމަށް ކުރިމަތިލުމަށް ހުޅުވާލުމުން ކުރިމަތިލެެއްވި ތިން ބޭފުޅުންނަކީ ވަގުތީގޮތުން ޕޮލިސް ކޮމިޝަނަރުގެ މަގާމު އަދާކުރައްވާ ޑެޕިއުޓީ ކޮމިޝަނަރު އިސްމާއިލް ނަވީނާއި ޑެޕިއުޓީ ކޮމިޝަނަރު ފަރުހާދު ފިކުރީގެ އިތުރުން ސައުތު ޕޮލިސް ކޮމާންޑަރު، އެސިސްޓަންޓް ކޮމިޝަނަރު އަހުމަދު ޝަމީމެވެ.
“މުޅިރާއްޖެ” އަށް އެނގިފައިވާ ގޮތުގައި އެ ތިން ބޭފުޅުންނާ ވެސް އިންޓަވިއުކޮށް، ނިންމުމަށްފަހު ޕޮލިސް ބޯޑުން ނިންމީ ތިން ބޭފުޅުންގެ ވެސް ޝަރުތު ހަމަވާ ކަމަށެވެ.
ޕޮލިސް ކޮމިޝަނަރުގެ މަގާމަށް ކުރިމަތިލެއްވި ތިން ބޭފުޅުންގެ ވެސް ޝަރުތު ހަމަވާ ކަމަށް ޕޮލިސް ބޯޑުން ނިންމުމުން، ހޯމްލޭންޑް މިނިސްޓަރު އަލީ އިހުސާންގެ ލަފާގެ މަތިން އެ މަގާމަށް ރައީސް ޑރ. މުހައްމަދު މުއިއްޒު ބޭފުޅަކު އައްޔަންކުރައްވާނެއެވެ.
ޕޮލިސް ކޮމިޝަނަރުގެ މަގާމު ހުސްވީ އެ މަގާމުގައި އެންމެ ފަހުން ހުންނެވި އަލީ ޝުޖާއު މިއަހަރުގެ އޭޕްރީލް މަހުގެ 26 ގައި މަގާމުން އިސްތިއުފާ ދެއްވައި، ރިޓަޔާ ކުރެއްވުމާ ގުޅިގެންނެވެ.
ކިޔުންތެރިންގެ ހިޔާލު