ނަށާ ގްރޫޕު، “ހިޔަލަ”ގެ ލަވައެއް ހުއްދަ ނުހޯދައި ދެއްކި މައްސަލައިގައި ޕަބްލިކް ސާވިސް މީޑިއާ (ޕީއެސްއެމް)އާ ދެކޮޅަށް ގާނޫނީ ފިޔަވަޅު އެޅުމަށް އެ ގްރޫޕުން ނިންމައިފިއެވެ.

އަޟްހާ އީދަށް ހާއްސަކޮށްގެން ޕީއެސްއެމްގެ ޝޯއެއްގައި ވަނީ ހިޔަލަ ގްރޫޕުގެ އީދު ލަވަ، “ބޯމަތިވަނީ” ގެނެސްދީފައެވެ. އެ ލަވަ ގެނެސްދެމުން ޕްރެޒެންޓަރު ބުނެފައިވަނީ އެއީ ޕީއެސްއެމްއަށް ލިބުނު ހަދިޔާއެއް ކަމަށެވެ.

އެކަމާ ގުޅިގެން ހިޔަލަ އިން ފޭސްބުކްގައި ކުރި ޕޯސްޓެއްގައި ބުނީ އެ ގްރޫޕުގެ “ބޯމަތިވަނީ” ލަވަ ގެނެސްފައިވަނީ ހުއްދަ ހޯދުމެއް ނެތި ކަމަށާއި ޓެލެވިޒަން މޯލްޑިވްސް (ޓީވީއެމް) ނުވަތަ އެހެން އެއްވެސް ޗެނަލަކުން އެކަމަށް ހުއްދަ ހޯދާފައިނުވާ ކަމަށެވެ. އަދި ހުއްދަ ނުހޯދައި އެ ލަވަ ދެއްކުމަކީ އެ ގްރޫޕުގެ ހައްގުތައް ނިގުޅައިގަތުން ކަމަށް ދެކޭ ކަމަށް ހިޔަލަ އިން ބުންޏެވެ.

އެ މައްސަލަ ސީރިއަސް މައްސަލައެއްގެ ގޮތުގައި ދެކި، ގާނޫނީ ފިޔަވަޅު އެޅުމުގެ މަސައްކަތް ކުރަމުން އަންނަ ކަމަށް ހިޔަލަ އިން ބުންޏެވެ.

އެ މައްސަލައިގައި މިހާތަނަށް ޕީއެސްއެމްގެ ބަހެއް ލިބިފައެއް ނުވެއެވެ.