ޗައިނާ ކިޔަވާކުދިންގެ ވިސާ ކެންސަލްކުރަން އެމެރިކާއިން ކުއްލިގޮތަކަށް ނިންމުމުން، ޗައިނާ ސަރުކާރުން ވަރަށް ބޮޑަށް ހިތްހަމަނުޖެހި ނުރުހުން ފާޅުކޮށް އެމެރިކާގެ ނިންމުން ވަރަށް ބޮޑަށް ކުށްވެރި ކޮށްފިއެވެ.
ޗައިނާ ސަރުކާރުން ބުނެފައިވަނީ، އެމެރިކާގެ ނިންމުމަކީ އެއްވެސް ސަބަބާނުލައި ނިންމި ނިންމުމެއް ކަމަށެވެ.
ޗައިނާގެ ކިޔަވާކުދިންގެ ވިސާ “އުދުވާނީގޮތެއްގައި” ކެންސަލްކުރަން ފަށާކަން އިއްޔެ އިއުލާން ކުރެއްވީ އެމެރިކާގެ ފޮރިން މިނިސްޓަރ މާރކޯ ރޫބިއޯއެވެ.
އޭނާ ވިދާޅުވީ، ވިސާ ކެންސަލްކުރާ ދަރިވަރުންގެ ތެރޭގައި، ޗައިނާގައި ވެރިކަންކުރާ ކޮމިއުނިސްޓް ޕާޓީއާ ގުޅުންހުރި ކިޔަވާކުދިންނާއި، ކްރިޓިކަލް ދާއިރާތަކުން ކިޔަވަމުންދާ ދަރިވަރުން ހިމެނޭ ކަމަށެވެ.
މީގެއިތުރުން، ކުރިއަށް އޮތްތަނުގައި ޗައިނާ އާއި ހޮންކޮންގުން ވިސާއަށް އެދޭ ހުރިހާ ފަރާތްތަކަށް ވިސާ ދިނުމުގައި މިހާރު އަމަލުކުރާ އުސޫލު އިތުރަށް ހަރުކަށި ކުރާނޭ ކަމަށްވެސް މާރކޯ ރޫބިއޯ ވިދާޅުވެފައި ވެއެވެ.
މިކަމަށް ރައްދުދެއްވައި ޗައިނާ ސަރުކާރުގެ ޚާރިޖިއްޔާގެ ތަރުޖަމާނު މާއޮ ނިންގް ވިދާޅުވީ، ފިކުރާއި ގައުމީ ހައްގުތައް ބަހަނާގެގޮތުގައި ދައްކައިގެން ޗައިނާ ކިޔަވާކުދިންގެ ވިސާ ކެންސަލް ކުރުމަކީ ހުއްޖަތެއް ނޫން ކަމަށެވެ.
ޗައިނާ ސަރުކާރުން މިހާރުވަނީ މިކަމާ ދެކޮޅުހަދައި، މި މައްސަލައިގެ ޝަކުވާ ރަސްމީގޮތުން އެމެރިކާ ސަރުކާރަށް ހުށަހަޅާފައެވެ.
ޗައިނާ ފޮރިން މިނިސްޓްރީންވަނީ، ދެގައުމުގެ ގުޅުން ބަދަހިކުރުމަށް އާރުލާގޮތެއްގައި މަސައްކަތް ކުރުމަށް އެމެރިކާ ސަރުކާރަށް އިލްތިމާސް ކޮށްފައެވެ.
ޗައިނާ ކިޔަވާކުދިންގެ ވިސާ ކެންސަލްކުރަން އެމެރިކާ ސަރުކާރުން ނިންމި ނިންމުމަށް އަމަލުކުރަން ފަށައިފިނަމަ، އެމެރިކާގެ ޔުނިވަރސިޓީތަކުގައި ކިޔަވާ ޗައިނާގެ އެތައްހާސް ކުދިންގެ ކިޔެވުން ހުއްޓޭނެއެވެ. ނަތީޖާއެއްގެގޮތުން، އެމެރިކާގެ ސްކޫލްތަކާއި، ޔުނިވަރިސިޓީތަކަށް އާމްދަނީ ލިބެމުންދިޔަ ދޮރުތައް ބަންދުވާނެއެވެ.
އަދި އެމެރިކާގެ ޓެކްނޮލޮޖީ ކުންފުނިތަކަށް ޗައިނާގެ ހުނަރުވެރިންގެ ފުރުސަތު ލިބުންވެސް ގެއްލިގެންދާނެއެވެ.
ކިޔުންތެރިންގެ ހިޔާލު