ސަޢޫދީ ޢަރަބިއްޔާގެ ޙައްޖާއި ޢުމްރާއާ ބެހޭ ވުޒާރާއިން ވަނީ މިއަހަރުގެ ޙައްޖު މޫސުމަށް ތައްޔާރުވުމުގެ ގޮތުން “ނުސުކް” ނަމަކަށް ކިޔާ ޚާއްޞަ ނިޒާމެއްގެ ބޭނުން އިތުރަށް ފުޅާކޮށްފައެވެ. މި ނިޒާމަކީ ޙައްޖާއި ޢުމްރާގެ ކަންކަން ޤަވާއިދުގެ ތެރެއިން، ވަކި އުސޫލަކުން ކުރިއަށްގެންދިޔުމަށް ތަޢާރަފްކުރި މަންސައެކެވެ.
ނުސުކް ނިޒާމުގެ ދަށުން، ކޮންމެ ޙާޖީއަކަށް “ނުސުކް ކާޑު” ނަމަކަށް ކިޔާ ޚާއްޞަ ފާހެއް ދޫކުރެވެއެވެ. މި ކާޑަކީ ޙައްޖުގެ އަޅުކަން އަދާކުރުމަށް ޙާޖީންނަށް ދޫކުރާ ރަސްމީ ފާހެވެ. ސަޢޫދީ ޢަރަބިއްޔާގެ ޙައްޖާ ބެހޭ ވުޒާރާއިން އަންގާފައިވާ ގޮތުގައި، ޙައްޖުގެ އަޅުކަން އަދާކުރުމުގައި އެންމެހާ ޙާޖީންގެ އަތުގައި ހުރިހާ ވަގުތަކު މި ފާސް އޮންނަންޖެހެއެވެ.
ނުސުކް ކާޑަކީ ޕްރިންޓުކޮށްފައި އޮންނަ ކާޑެކެވެ. މި ކާޑު ބޭނުންކުރެވެނީ ޙައްޖުގެ މަނާސިކުތައް އަދާކުރުމަށް އެއްތަނުން އަނެއްތަނަށް ދަތުރުކުރާއިރު އަދި ޙައްޖާ ގުޅުންހުރި ޚިދުމަތްތައް ހޯދާއިރުއެވެ. މިއީ ޙައްޖުގެ މަނާސިކުތައް އަދާކުރުމަށް ތަންތަނަށް ވަނުމުގައި ފަސޭހަވާނެ ވަސީލަތެކެވެ.
ދިވެހިރާއްޖޭގެ ޙައްޖު ކޯޕަރޭޝަނުން ވަނީ ދިވެހި ހުރިހާ ޙާޖީންވެސް ހުރިހާ ވަގުތެއްގައި ނުސުކް ކާޑު އަޅައިގެން އުޅުމަށް އިލްތިމާސްކޮށްފައެވެ. މިއީ ދިވެހި އެއްވެސް ޙާޖީއަކަށް ޙައްޖުގެ އަޅުކަން އަދާކުރުމުގެ ފުރުޞަތު ގެއްލުނަ ނުދިނުމަށް އެޅޭ ފިޔަވަޅެކެވެ.
ސަޢޫދީ ސަރުކާރުން ވަނީ ނުސުކް މަންސަ މެދުވެރިކޮށް ހުއްދަ ހޯދައިގެން މެނުވީ 1446ވަނަ އަހަރުގެ ޙައްޖުގެ އަޅުކަން އަދާކުރުމުގެ ފުރުޞަތު އެއްވެސް ބަޔަކަށް ނުދޭނެކަމަށް އަންގާފައެވެ. މީގެ ބޭނުމަކީ ޙައްޖުގެ އަޅުކަން އަދާކުރުމަށް ދުނިޔޭގެ ކަންކޮޅުތަކުން ސަޢޫދީއަށް އެތެރެވާ އެންމެހާ ޙާޖީންގެ ސަލާމަތާއި ރައްކާތެރިކަން ކަށަވަރުކުރުމެވެ.
ކިޔުންތެރިންގެ ހިޔާލު