މިކަމަށް ހިޔާލު ހޯދުމަށް އެމްޓީސީސީން ވަނީ ކިއުއާރު ކޯޑެއް މެދުވެރިކޮށް ސާވޭއެއް ހެދުމަށް ހުޅުވާލާފައެވެ. އަދި މި ސާވޭގައި ބައިވެރިވެ ޚިޔާލު ދިނުމަށް އާންމުންގެ ކިބައިން އެކުންފުނިން ވަނީ އެދިފައެވެ.
އެމްޓީސީސީން ބުނިގޮތުގައި މިކަން މިގޮތަށް ކުރިއަށް ގެންދިއުމަށް ނިންމާފައިވަނީ މަގު ތަރައްގީ ކުރުމުގައި އާންމުންގެ ބޭނުންތަކާއި އެދުންތަކަށް އިސްކަން ދިނުމުގެ ގޮތުންނެވެ. އަދި މިކަމުގައި އާންމުންގެ ހިޔާލަކީ ވަރަށް މުހިންމު އެއްޗެއް ކަމަށް އެ ކުންފުނިން ބުންޏެވެ.
މި ސާވޭގައި ބައިވެރިވުމަށް އެމްޓީސީސީން ދީފައިވާ ކިއުއާރު ކޯޑު ސްކޭން ކުރުމަށްފަހު ކުރު ސަރވޭއެއް ފުރިހަމަ ކުރަން ޖެހެއެވެ. އަދި މި ސަރވޭގައި ދެވޭ ހިޔާލުތަކަކީ މަގު ތަރައްގީ ކުރުމުގެ މަސައްކަތް ރޭވުމުގައި ވަރަށް މުހިންމު ދައުރެއް އަދާކުރާނެ ކަމެއްކަމުގައި އެމްޓީސީސީން ބުނެފައިވެއެވެ.
މި މަޝްރޫޢުގެ ދަށުން ހުޅުމާލޭ ފެރީ ޓާމިނަލުން ފެށިގެން ލޯކަލް މާރުކޭޓާ ހަމައަށް 830 މީޓަރުގެ ސަރަޙައްދެއް ތަރައްޤީ ކުރެވޭނެއެވެ.
މި މަޝްރޫޢުގެ އަގަކީ 144.5 މިލިއަން ރުފިޔާ ކަމަށްވާއިރު، 455 ދުވަހުގެ ތެރޭގައި މަސައްކަތް ނިންމުމަށް ވަނީ ހަމަޖެހިފައެވެ. މަޝްރޫޢުގެ ދަށުން މަގު ފުޅާކުރުމުގެ އިތުރުން، ކީވޯލް ބޭރަށް ޖެއްސުމާއި، ދުވާރު ހެދުމާއި، ފެން ހިންދާ ނިޒާމް ޤާއިމްކުރުމާއި، ރޯޑް މާކިންގ އަދި ސައިން ބޯޑު ހަރުކުރުން ފަދަ މަސައްކަތްތައް ހިމެނެއެވެ.
މި މަޝްރޫޢަކީ މާލޭގެ ނޯތު ހާބަރާ ހަމައަށް ކުރިއަށްގެންދެވޭ މަސައްކަތެއްގެ ފުރަތަމަ ފިޔަވަހި ކަމަށް އިމާރާތްކުރުމާއި ގެދޮރުވެރިކަމާއި ބިނާވެށީގެ ވަޒީރު ޑރ. ޢަބްދުﷲ މުއްޠަލިބު ވިދާޅުވެފައިވެއެވެ. އަދި މި މަސައްކަތް ކުރިއަށް ގެންދާނީ ކަމާ ގުޅުންހުރި ފަރާތްތަކާއެކު ރޭވިގެން، އެ ސަރަޙައްދުގެ ޓްރެފިކަށް ފަސޭހަވާނެ ގޮތަށް ކަމަށްވެސް ވަޒީރު ފާހަގަކުރައްވާފައިވެއެވެ.
ކިޔުންތެރިންގެ ހިޔާލު