މިދިޔަ މަހުގެ 18 ވަނަ ދުވަހުގެ ފަތިހު ހެންވޭރު ގެއެއްގެ ފުރާޅު މައްޗަށް ހައްވާ ޔުމްނު ރަޝީދު ވެއްޓުނު ހާދިސާގެ ތަހުގީގުގައި ފުލުހުން އަމަލުކުރި ގޮތުގައި ގޯހެއް އޮތްކަން މިހާތަނަށް ފާހަގަވެފައި ނުވާ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.
‘އަހާ’ ފޯރަމްގައި މިރޭ ވާހަކަ ދައްކަވަމުން އިހުސާން ވިދާޅުވީ ތަހުގީގެއްގައި އާންމުކޮށް މައުލޫމާތު ނުދޭހާ އަވަހަށް މި މައްސަލައިގައި ރައްޔިތުންނަށް މައުލޫމާތުތަކެއް ދޭން ފެށި ކަމަށާއި ފުލުހުން މަސައްކަތް ކުރަމުންދަނީ ފުލުހުންގެ ކަނޑައެޅިފައިވާ މިންގަނޑުތަކާއި އެއްގޮތަށް ކަމަށެވެ.
ފުލުހުން ކުރާ މަސައްކަތުގައި މައްސަލައެއް އުޅޭތޯ ތަހުގީގުކުރާ ދެތިން އިދާރާއެއް އަދި އެބައޮތް ކަމަށާއި އެ އިދާރާތަކުން ވެސް އެކަންކަން ބަލަމުންދާ ކަމަށް އިހުސާން ވިދާޅުވިއެވެ.
“އަދި އަދަށް ދާންދެން އަޅުގަނޑާއި ހިސާބަކަށް ފުލުހުން މި މައްސަލައިގައި އަމަލުކުރި ގޮތުގެ އެއްވެސް ގޯހެއް އަދިއެއް އަޅުގަނޑުމެންނާއި ހިސާބަށް ފާހަގަވެފައެއް ނެތް،” އިހުސާން ވިދާޅުވިއެވެ.
މި ހާދިސާގައި ލިބުނު އަނިޔާތަކަށް ޔުމްނު އަށް ފަރުވާދެމުން އަންނަނީ މެލޭޝިޔާގައެވެ.
އެ މައްސަލައިގެ ތަހުގީގަށް އެރޭ ޔުމްނުއާއެކު އުޅުނު ރައުދު އަހުމަދު ޒިލާލު ވަނީ ހައްޔަރުކޮށްފައެވެ.
ކިޔުންތެރިންގެ ހިޔާލު