ނޭޝަނަލް ޖުވެނައިލް ޖަސްޓިސް ކޮންފަރެންސް މިއަދު ރަސްމީކޮށް ފައްޓަވައިދެއްވައިފިއެވެ. މި މަހުގެ 12 ވަނަ ދުވަހުގެ ނިޔަލަށް ކުރިއަށްދާ މި ކޮންފަރެންސްއަކީ، ކަމާ ގުޅުންހުރި އެންމެހައި އިދާރާތައް ހިމެނޭގޮތަށް ބޭއްވޭ މިބާވަތުގެ ފުރަތަމަ ކޮންފަރެންސެވެ.

ރައީސުލްޖުމްހޫރިއްޔާގެ އަނބިކަނބަލުން، މެޑަމް ސާޖިދާ މުޙައްމަދު ވަނީ މި ކޮންފަރެންސް ރަސްމީކޮށް ފައްޓަވައިދެއްވާފައެވެ. ޕްރޮސެކިއުޓަރ ޖެނެރަލްގެ އޮފީހާއި ޔުނިސެފް ގުޅިގެން އިންތިޒާމުކޮށްގެން ކުރިއަށްގެންދާ މި ކޮންފަރެންސްގެ މައިގަނޑު މަޤްޞަދުތަކުގެ ތެރޭގައި، އިލްމީ ހޯދުންތަކުގެ މައްޗަށް ބިނާކޮށް ނިޒާމުގައި ހުރި މައްސަލަތަކަށް ޙައްލު ހޯދުމާއި، މި ދާއިރާގައި ހިއްސާވާ އެކި އިދާރާތަކުގެ މެދުގައި އޮންނަ ގުޅުން ބަދަހިކޮށް، އެ ފަރާތްތަކުގެ މެދުގައި ހުރި ހުރަސްތައް ނައްތާލުމަށް މަސައްކަތްކުރުން ހިމެނެއެވެ.

މި ކޮންފަރެންސްގައި، މި ދާއިރާއާ ގުޅުންހުރި އަށް ދިރާސީ ކަރުދާސް ހުށަހެޅުމަށް ވަނީ ހަމަޖެހިފައެވެ. މީގެ ތެރޭގައި ކަމާ ގުޅުންހުރި އިދާރާތަކާއި، ކޮލެޖު އަދި ޔުނިވަރސިޓީތަކުން ހުށަހަޅާ ޕޭޕަރުތައް ހިމެނެއެވެ. އަދި މީގެ އިތުރުން، ދެ ކީނޯޓް ސްޕީކަރުން ވާހަކަފުޅު ދެއްކެވުމަށްވެސް ވަނީ ހަމަޖެހިފައެވެ.

ދިވެހިރާއްޖޭގެ ޖުވެނައިލް ޖަސްޓިސް ނިޒާމު ބިނާވެފައިވަނީ ރިހެބިލިޓޭޝަން، ރީއިންޓެގްރޭޝަން އަދި ރިސްޓޯރޭޓިވް ޖަސްޓިސްގެ އުސޫލުތަކުގެ މައްޗަށެވެ. މި ނިޒާމުގެ މައިގަނޑު މަޤްޞަދަކީ ކުށް ތަކުރާރުކުރުން ހުއްޓުވުމާއި، ކުށްވެރިން އަނބުރާ މުޖުތަމަޢަށް ގެނައުމެވެ. ނަމަވެސް، ކުށް ހުއްޓުވުމާއި، ޑައިވާޝަން ޕްރޮގްރާމްތަކާއި، ރިހެބިލިޓޭޝަންގެ ޚިދުމަތްތަކާއި، ބަންދު ނޫން އެހެނިހެން ފިޔަވަޅުތައް އެޅުން ފަދަ ދާއިރާތަކުގައި ގިނަގުނަ ގޮންޖެހުންތައް ދިމާވަމުންދެއެވެ.

ޒުވާން ކުށްވެރިން ކާމިޔާބުކަމާއެކު އަލުން މުޖުތަމަޢަށް އަހުލުވެރިކުރުވުމަކީ ގިނަ ދާއިރާތަކެއްގެ މަސައްކަތް އެކުގައި ކުރަންޖެހޭ ކަމެކެވެ. އަދި މިކަމުގައިވެސް ގިނަގުނަ ގޮންޖެހުންތަކެއް ކުރިމަތިވެއެވެ.