މިއަހަރު ރާއްޖޭގެ އެކި ކަންކޮޅުތަކުގައި 2000 އަށްވުރެ ގިނަ މަޝްރޫޢު އެއްފަހަރާ ފެށިގެންދާނެކަމަށް މަސްވެރިކަމާއި ކަނޑުގެ ވަސީލަތްތަކާބެހޭ ވަޒ ވަޒީރު އަޙްމަދު ޝިޔާމް މިއަދު ހާމަކުރައްވައިފިއެވެ.
ވަޒީރު ޝިޔާމް މިފަދައިން ވިދާޅުވެފައިވަނީ ޕީއެންސީގެ ހަރުގޭގައި ބޭއްވުނު ޖަލްސާއެއްގައި ވާހަކަފުޅު ދައްކަވަމުންނެވެ. އެމަނިކުފާނު ވިދާޅުވީ މިއަދު ބޭއްވުނު ވަޒީރުންގެ މަޖިލީހުގެ ވަރކިންގ ސެޝަންގައި ކުރީގެ ސަރުކާރުން ހުއްޓިފައިވާ މަޝްރޫޢުތަކާއި، މިހާރުގެ ސަރުކާރުން ފަށާފައިވާ އަދި އަލަށް ފަށަން ހުރި މަޝްރޫޢުތަކުގެ މަޢުލޫމާތު ދިރާސާކުރެވުނު ކަމަށެވެ.
ވަޒީރު އިތުރަށް ވިދާޅުވީ، ރާއްޖެއަށް ކުރިމަތިވެފައިވާ މާލީ ގޮންޖެހުންތަކުން އަރައިގަނެވެމުންދާތީ، މަޝްރޫޢުތަކުގެ ސްޕީޑު އަވަސްކުރުމާއި، ރަށްރަށުގައި ހިންގާ މަޝްރޫޢުތައް ނިންމާނެ މުއްދަތުތައް ކަނޑައެޅުމުގެ މަސައްކަތް މިއަދުގެ ބައްދަލުވުމުގައި ކުރެވުނު ކަމަށެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުތަކާ ގުޅޭގޮތުން ވާހަކަފުޅު ދައްކަވަމުން ވަޒީރު ޝިޔާމް ވިދާޅުވީ، ރައީސް މުޢިއްޒަކީ ވަޢުދުތައް ފުއްދަވާ ބޭފުޅެއްކަމާއި، އެ ވަޢުދުތައް ތަންފީޒުކުރެއްވުމަށް ބާރުދުވެއްޔެއްގައި މަސައްކަތް ކުރައްވަމުންދާ ކަމަށެވެ.
“2025 ވަނަ އަހަރަކީ ރައީސް ޑރ. މުޙައްމަދު މުޢިއްޒުގެ ސަރުކާރުގައި އެންމެ ގިނަ މަޝްރޫޢު އެއްފަހަރާ ހިންގާނެ އަހަރުކަން މިއަދު އަޅުގަނޑުމެންނަށް ޔަޤީންވެގެން ހިނގައްޖެ. އެއްފަހަރާ 2000 އަށްވުރެ ގިނަ މަޝްރޫޢު ރާއްޖޭގެ އެކި ސަރަޙައްދުތަކުގައި މިއަހަރު ފެށިގެންދާނެކަންވެސް މިއަދު އެނގިގެންދިޔަ,” ވަޒީރު ޝިޔާމް ވިދާޅުވިއެވެ.
ވަޒީރު އިތުރަށް ފާހަގަކުރެއްވީ، ރާއްޖެ ބަނގުރޫޓުވެދާނެ ކަމަށް ބައެއް ފަރާތްތަކުންތަކުން ބުނަމުންދިޔަ ނަމަވެސް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެޅުއްވި މާލީ އަދި އިޤްތިޞާދީ ހަރުދަނާ ފިޔަވަޅުތަކުގެ ސަބަބުން ރާއްޖެ މިހާރު ވަނީ ސަލާމަތުގެ އައްސޭރިއަކަށް އާދެވިފައި ކަމަށެވެ.
