ހުޅުމާލޭގެ ދެވަނަ ފިޔަވަހީގައި ކަރަންޓު ވިއުގައަށް ކުރަންޖެހޭ އެމަރޖެންސީ މަރާމާތުތަކެއް ކުރުމަށްޓަކައި، މިއަދު ވަގަގުތީގޮތުން ކަރަންޓު މެދުކަނޑާލަން ޖެހޭ ކަމަށް ސްޓޭޓް އިލެކްޓްރިކްް ކޮމްޕެނީ ލިމިޓެޑް (ސްޓެލްކޯ) އިން އަންގަވައިފިއެވެ.
ސްޓެލްކޯގެ ރަސްމީ އެކްސް އެކައުންޓުގައި ޝާއިޢުކުރެއްވި ޕޯސްޓެއްގައި ވިދާޅުވެފައިވާ ގޮތުގައި، ހޯކްސް ޕެޓްރޯލް ޝެޑާއި، އެމްއޭސީއެލް، ސްޓެލްކޯ، އެމްޑަބްލިއުއެސްސީ އަދި އެސްޓީއޯ ޓަވަރުތަކުން މިއަދު ހެނދުނު 9:30 އިން 10:30 އާ ދެމެދު ކަރަންޓު ކެނޑިގެންދާނެއެވެ. ނަމަވެސް މަސައްކަތް ނިމުމާއެކު ވީ އެންމެ އަވަހަކަށް ކަރަންޓު އަލުން ގުޅައިދެވޭނެ ކަމަށް އެ ކުންފުނިން ވިދާޅުވެފައިވެއެވެ.
މީގެ އިތުރުން، ހުޅުމާލެ ފޭސް 2 ގައި ހުންނަ ހިޔާ 5 ވަނަ ޓަވަރު (އެޗް5) ގެ ކޮންމެ އެޕާޓްމަންޓަކުންވެސް މިއަދުގެ ހެނދުނު 9:00 އިން ހަވީރު 17:00 އާ ދެމެދު ގާތްގަނޑަކަށް 30 މިނިޓަށް ކަރަންޓު ކެނޑިގެންދާނެ ކަމަށްވެސް ސްޓެލްކޯއިން އިތުރު ޕޯސްޓެއްގައި ހާމަކުރައްވާފައިވެއެވެ.
މި މަސައްކަތްތަކަކީ ކަސްޓަމަރުންނަށް މެދުނުކެނޑި، އެންމެ ފުރިހަމަ ގޮތުގައި ޚިދުމަތް ފޯރުކޮށްދިނުމަށްޓަކައި ކުރެވޭ މުހިންމު މަސައްކަތްތަކެއް ކަމަށް ސްޓެލްކޯއިން ފާހަގަކުރައްވައެވެ. އަދި މި މަސައްކަތްތައް އެކި ދުވަސްތަކަށް ބަހާލައިގެން ކުރިއަށް ގެންދާ ކަމަށާއި، މިކަމާ ގުޅިގެން ދިމާވެދާނެ ދަތިތަކަށް މާފަށް އެދިވަޑައިގަންނަވާ ކަމަށްވެސް އެ ކުންފުނިން ވިދާޅުވެފައިވެއެވެ.
ކިޔުންތެރިންގެ ހިޔާލު