ސުޕްރީމް ކޯޓުގެ ފަނޑިޔާރު ޑރ. އަޒްމިރަލްދާ ޒާހިރާއި ފަނޑިޔާރު މަހާޒް އަލީ ޒާހިރު، މަގާމުގެ ނުފޫޒު ފޯރުވި ކަމަށް ތުހުމަތުވާ މައްސަލައިގެ ފަހު އަޑުއެހުންތައް މާދަމާއަށް ތާވަލުކޮށްފިއެވެ.

މައުލޫމާތު ލިބިފައިވާ ގޮތުގައި އަޒްމިރަލްދާ އާއި މަހާޒަށް މިހާރު ވަނީ ޖުޑީޝަލް ސާވިސް ކޮމިޝަން (ޖޭއެސްސީ)އަށް ހާޒިރުވުމަށް އަންގައިފައެވެ. އެގޮތުން މާދަމާ ހެނދުނު 9:00 ގައި ހާޒިރުވުމަށް މަހާޒަށް އަންގާފައިވާ އިރު، އަޒްމިރަލްދާއަށް އަންގާފައިވަނީ މާދަމާ ހެނދުނު 10:00 ގައި ހާޒިރުވުމަށެވެ.

ޖޭއެސްސީން ދަނީ އަޒްމިރަލްދާ އާއި މަހާޒުގެ ދެ މައްސަލައެއް ބަލަމުންނެވެ. އޭގެ ތެރެއިން އެއް މައްސަލައަކީ ހައިކޯޓުގެ ކުރީގެ އެސިސްޓަންޓް ރަޖިސްޓްރާ ހުސައިން މުހައްމަދު ހަނީފު ސްޕްރީމް ކޯޓަށް ހާޒިރުކޮށް ހުސްނުއްސުއޫދު “ހުތުރު ބަހުން” ވާހަކަދެއްކެވި މަޖިލީހުގައި ފަނޑިޔަރު މަހާޒާއި ފަނޑިޔާރު އަޒްމިރަލްދާ ތިއްބެވި މައްސަލައެވެ.

އަދި އަނެއް މައްސަލައަކީ ޖޭއެސްސީން އަޒްމިރަލްދާގެ ފިރިކަލުން ބަންދުކުރުމުގެ އަމުރަކަށް ނުފޫޒު ފޯރުވި ކަމަށް ކުރާ ތުހުމަތުގެ މައްސަލައެވެ. އެ ދެ މައްސަލައިގައި ވެސް ޖޭއެސްސީން ބަލަމުންދަނީ އަޒްމިރަލްދާ އާއި މަހާޒްގެ މައްސަލައެވެ.

ޖޭއެސްސީން ބަލަމުންދާ މައްސަލަތަކުގެ ތަހުގީގަށް މީގެ ކުރިން ވެސް އަޒްމިރަލްދާ އާއި މަހާޒް ވަނީ ޖޭއެސްސީއަށް ހާޒިރުކޮށްފައެވެ. ޖޭއެސްސީއަށް ހާޒިރުކުރުމުން އެ ދެ ފަނޑިޔާރުން ވެސް ވަނީ ތުހުމަތުތަކަށް އިންކާރުކޮށްފައެވެ.

ޖޭއެސްސީން އަޒްމިރަލްދާ އާއި މަހާޒްގެ އިތުރުން ސުޕްރީމް ކޯޓުގެ ފަނޑިޔާރުކަން ކުރައްވަމުން ގެންދެވި ހުސްނުއްސުއޫދުގެ މައްސަލަ ވެސް ބަލަން ފެށިއެވެ. ނަމަވެސް ސަސްޕެންޝަނުގައި ހުންނަވަނިކޮށް، ސުއޫދު ވަނީ ފަނޑިޔާރުކަމުގެ މަގާމުން އިސްތިއުފާދެއްވައިފައެވެ.

ޖޭއެސްސީން އަޒްމިރަލްދާ އާއި މަހާޒް އަދި ސުއޫދު ސަސްޕެންޑުކޮށްފައިވަނީ އެންޓި ކޮރަޕްޝަން ކޮމިޝަން (އޭސީސީ) އިން ބަލަމުންދާ މައްސަލައަކާ ގުޅިގެން ކަމަށް ބުނެއެވެ. ޖޭއެސްސީން ތިން ފަނޑީޔާރުންގެ މައްސަލަ ބަލަން ފަށާފައިވަނީ އޭގެ ފަހުންނެވެ.