އިންޓަރ-ޕާލަމެންޓަރީ ޔޫނިއަން (އައިޕީޔޫ) ގެ އޭޝިއާ ޕެސިފިކް ސަރަޙައްދު ތަމްސީލުކުރާ ތިން މުހިންމު މަޤާމަކަށް ރައްޔިތުންގެ މަޖިލީހުގެ ތިން މެންބަރުން އިންތިޚާބުވެވަޑައިގެންފިއެވެ.
ރައްޔިތުންގެ މަޖިލީހުގެ އިދާރާއިން ހާމަކުރެއްވި ގޮތުގައި، މި ތިން މެންބަރުން އައިޕީޔޫގެ މަޤާމުތަކަށް އިންތިޚާބުވެވަޑައިގަތީ އުޒްބަކިސްތާނުގައި ބޭއްވުނު އައިޕީޔޫގެ 150 ވަނަ އެސެމްބްލީގައެވެ. އެގޮތުން:
1. ހުރާ ދާއިރާގެ މެންބަރު ޑރ. އަނާރާ ނަޢީމް އިންތިޚާބުވެވަޑައިގަތީ ބިއުރޯ އޮފް ވިމެން ޕާލަމަންޓޭރިއަންސްއަށެވެ.
2. ގައްދޫ ދާއިރާގެ މެންބަރު މުޙައްމަދު ޢަލީ އިންތިޚާބުވެވަޑައިގަތީ ވޯކިންގ ގްރޫޕް އޮން ސައިންސް އެންޑް ޓެކްނޮލޮޖީއަށެވެ.
3. ނިލަންދޫ ދާއިރާގެ މެންބަރު ފާޠިމަތު ސަޢުދާ އިންތިޚާބުވެވަޑައިގަތީ ސްޓޭންޑިންގ ކޮމިޓީ އޮން ޕީސް އެންޑް އިންޓަރނޭޝަނަލް ސެކިއުރިޓީއަށެވެ.
މި ތިން މެންބަރުންވެސް އިންތިޚާބުވެވަޑައިގެންފައިވަނީ ދިވެހިރާއްޖެ ހިމެނޭ އޭޝިއާ ޕެސިފިކް ގްރޫޕް ތަމްސީލުކުރެއްވުމަށެވެ. ކުރީގައިވެސް ރާއްޖޭގެ ރައްޔިތުންގެ މަޖިލީހުގެ މެންބަރުން ވަނީ އައިޕީޔޫގެ އެކި މަޤާމުތައް ފުރުއްވާފައެވެ.
އައިޕީޔޫގެ 150 ވަނަ އެސެމްބްލީ އުޒްބަކިސްތާނުގެ ވެރިރަށް ތަޝްކެންޓުގައި ބޭއްވުނީ މި މަހުގެ 5 އިން 9 އަށެވެ. މި އަހަރުގެ ބައްދަލުވުމުގައި ރާއްޖޭގެ ޤާނޫނު ހަދާ މަޖިލީހުގެ ފަރާތުން މަޖިލީހުގެ ރައީސް އިތުރުން ފަސް މެންބަރުން ބައިވެރިވެވަޑައިގެންނެވިއެވެ.
އިންޓަރ-ޕާލަމެންޓަރީ ޔޫނިއަން (އައިޕީޔޫ) އަކީ މިނިވަން ޤައުމުތަކުގެ ޤާނޫނު ހަދާ މަޖިލިސްތަކުގެ މައްޗަށް އެކުލެވޭ ބައިނަލްއަޤްވާމީ ޖަމްޢިއްޔާއެކެވެ. 1889 ވަނަ އަހަރު އުފެދުނު މި ޖަމްޢިއްޔާގައި ދިވެހިރާއްޖޭގެ ޤާނޫނު ހަދާ މަޖިލިސް ބައިވެރިވެފައިވަނީ 2005 ވަނަ އަހަރުގައެވެ.
