އިނގިރޭސިވިލާތުގެ ނަމުދަރަ ފުޓްބޯޅަ ކުލަބު ލިވަޕޫލްގެ ޓޫރިޒަމް ޑެސްޓިނޭޝަން ޕާޓްނަރެއްގެ ގޮތުގައި ދިވެހިރާއްޖެ ޕްރޮމޯޓުކުރުމުގެ މަސައްކަތްތަކުގެ އިތުރުން، އެ ކުލަބުގެ ޓެކްނިކަލް އެހީތެރިކަން ދިވެހި ފުޓްބޯޅައަށް ލިބިގެންދާނެކަމަށް ކުޅިވަރާއި ޒުވާނުންގެ ކަންކަމާ ބެހޭ ވަޒީރު އަބްދުﷲ ރާފިޢު ވިދާޅުވެއްޖެއެވެ.
އިނގިރޭސިވިލާތަށް ކުރެއްވި ކާމިޔާބު ދަތުރުފުޅަކަށްފަހު ޕީއެސްއެމް ނިއުސްއަށް ދެއްވި ޚާއްޞަ އިންޓަވިއުއެއްގައި ވަޒީރު ރާފިޢު ވިދާޅުވީ މި ދަތުރުގެ ސަބަބުން ދިވެހިރާއްޖެއަށް ގިނަގުނަ ފައިދާތަކެއް ކުރާނެކަމަށެވެ. ފުޓްބޯޅަ އިތުރަށް ތަރައްޤީކޮށް ކުރިއެރުވުމަށްވެސް ލިވަޕޫލުގެ އެހީތެރިކަން ލިބިގެންދާނެކަން ފާހަގަކުރައްވަމުން ވަޒީރު ވިދާޅުވީ މި ކަންކަމަކީ ކުރެވުނު މަޝްވަރާތަކުގެ އަލީގައި ދެފަރާތުން އެއްބަސްވެވުނު ކަންތައްތައް ކަމަށެވެ.
“އަޅުގަނޑުމެންނަށް ދެކެވުނު ވާހަކަތަކުގެ ތެރޭގައި ލިވަޕޫލް އިންޓަނޭޝަނަލް އެކެޑަމީއާއެކު މަޝްވަރާކުރެވުނެވެ. އެ ބޭފުޅުން ޕްރެޒެންޓޭޝަނެއް ހުށަހެޅުއްވިއެވެ. މީގެ ތެރޭގައި އެ ބޭފުޅުންގެ އެކަޑަމީގެ ނައިބު ރައީސް، އެންމެ އިސް ތަރައްޤީގެ ކޯޗު، އަދި އިސް ވިޔަފާރި މެނޭޖަރުވެސް ހިމެނޭ ގޮތަށް، ގާތްގަނޑަކަށް އެއް ގަޑިއިރުގެ ބައްދަލުވުމެއް ބޭއްވުނެވެ.” ދަތުރުގެ މަޝްވަރާތަކާ ގުޅޭގޮތުން ރާފިޢު ވިދާޅުވިއެވެ.
މިއީ އެހެން ޤައުމުތަކުގައިވެސް ލިވަޕޫލުން ކުރިއަށްގެންދާ މަޝްރޫޢުތަކެއްކަން ފާހަގަކުރައްވަމުން ރާފިޢު ވަނީ ދިވެހިރާއްޖޭގައި ލިވަޕޫލްގެ ކޯޗުން އުފެއްދުމުގެ މުހިންމުކަމާ ގުޅޭގޮތުން ދެ ފަރާތުން މަޝްވަރާކުރެވުނު ކަމަށްވެސް ވިދާޅުވެފައެވެ. އަދި ލިވަޕޫލްގެ އެކެޑަމީއެއް ދިވެހިރާއްޖޭގައި ޤާއިމުކުރުމަށް ބޭނުންވާ ވާހަކަ ބައްދަލުވުމުގައި ލިވަޕޫލުން ހުށަހެޅުއްވި ކަމަށް ރާފިޢު ވިދާޅުވިއެވެ.
“އަޅުގަނޑުމެންނަށްވެސް އެއްބަސްވެވުނީ އެ ބޭފުޅުންގެ އެންމެ މަދު މިންވަރުގެ ޝަރުޠުތަކަކީ ކޮބައިތޯ ބެލުމަށެވެ. މި މަސައްކަތް ފެށުމަށް ކޮންކަހަލަ ކަންތައްތަކެއް، ކޮންކަހަލަ ވަސީލަތްތަކެއްތޯ ބޭނުންވާނީ އަދި ޝައުޤުވެރިވާ ކޯޗުންނަކީ ކޮންބައެއްކަން ދެނެގަތުމަށެވެ.” ލިވަޕޫލްގެ އެކެޑަމީއެއް ޤާއިމުކުރުމަށް ފާޅުކުރެއްވި ޝައުޤުވެރިކަމާ ގުޅޭގޮތުން ރާފިޢު ވިދާޅުވިއެވެ.
މި ދަތުރުން އެނގިގެންދިޔަ ގޮތުގައި މިހާރު ތިބި ދިވެހި ކޯޗުން މި މަޝްރޫޢުގައި ބައިވެރިވާނެ ކަމަށާއި، އެންމެ މުހިންމު ކަމަކީ ލިވަޕޫލްގެ ކޯޗުންނަށް ވާން ބޭނުންވާ ފަރާތްތަކަށް އޮތް ފުރުޞަތުކަން ރާފިޢު ފާހަގަކުރެއްވިއެވެ. މި މަޝްރޫޢުގެ ތަޢުލީމީ ބައިތައް ތަރައްޤީކޮށް ކުރިއަށްގެންދާނީ ލިވަޕޫލްއިންނެވެ. މިކަމަށްޓަކައި ލިވަޕޫލްގެ ޚާއްޞަ ކޯޗެއް ދިވެހިރާއްޖޭގައި މަސައްކަތްކުރައްވާނެ ކަމަށްވެސް ރާފިޢު ވިދާޅުވިއެވެ.
މި ދަތުރުވެގެންދިޔައީ ކުރެވުނު މަޝްވަރާތަކުގެ އަލީގައި ރަސްމީ އެއްބަސްވުމަކާ ހަމައަށް ވާސިލުވުމުގެ ފެށުން ކަމަށް ރާފިޢު ވިދާޅުވިއެވެ. އަދި ވަރަށް އަވަހަށް އެކަމުގެ މަޢުލޫމާތު ލިވަޕޫލުން ދިވެހި ސަރުކާރާ ހިއްސާކުރައްވާނެ ކަމަށްވެސް ވަޒީރު ވިދާޅުވިއެވެ.
މި ދަތުރުފުޅުގައި ލިވަޕޫލްގެ ޓޫރިޒަމް ޑެސްޓިނޭޝަން ޕާޓްނަރެއްގެ ގޮތުގައި ދިވެހިރާއްޖެ ޕްރޮމޯޓުކުރުމުގެ ކެމްޕޭން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިފްތިތާޙުކޮށްދެއްވުމުގެ އިތުރުން ލިވަޕޫލްގެ އަކްސާ ހައި ޕަރފޯމަންސް ސެންޓަރަށް ވެސް ވަނީ ޒިޔާރަތްކުރައްވާފައެވެ. އެ ތަނަކީ އެންމެ ފަހުން އިނގިރޭސިވިލާތުގައި ހުޅުވިގެންދިޔަ އެންމެ ޒަމާނީ ހައި ޕަރފޯމަންސް ސެންޓަރެވެ.
މި އެއްބަސްވުމުގެ ދަށުން ދިވެހި ފުޓްބޯޅައަށް ލިބިގެންދާނެ ޓެކްނިކަލް އެހީތެރިކަމަކީ ޤައުމީ ފެންވަރުގައި ފުޓްބޯޅަ ކުރިއެރުވުމަށް ލިބޭނެ މުހިންމު ހިތްވަރެކެވެ. ލިވަޕޫލްފަދަ ބައިނަލްއަޤްވާމީ ފެންވަރުގެ ކުލަބަކުން ދިވެހި ކުޅުންތެރިންނަށާއި ކޯޗުންނަށް ލިބޭ ތަޖުރިބާއާއި ތަމްރީނުތަކަކީ ދިވެހި ފުޓްބޯޅައިގެ މުސްތަޤުބަލަށް އުއްމީދީ މަންޒަރެއް ކުރެހޭނެ ކަމެކެވެ. މީގެ އިތުރުން، ދިވެހިރާއްޖެ ޓޫރިޒަމް ޑެސްޓިނޭޝަނެއްގެ ގޮތުގައި ޕްރޮމޯޓްކުރުމުން ފަތުރުވެރިކަމުގެ ދާއިރާއަށްވެސް ފައިދާތަކެއް ކުރާނެކަން ޔަޤީނެވެ.
