އއ. ހިމަންދޫ ބަނދަރުގައި އޮތް ލޯންޗެއްގައި އަލިފާން ރޯވެއްޖެއެވެ.

ފުލުހުން މިއަދު ބުނީ ހިމަންދޫ ބަނދަރުގައި އޮތް “ކައެލް ވިންގް” ނަމަކަށް ކިޔާ ލޯންޗެއްގައި އަލިފާން ރޯވެފައިވާ މައްސަލައެއް މިއަދު ހެނދުނު 5:50 ހާއިރު ރިޕޯޓުކޮށްފައިވާ ކަމަށާއި ލޯންޗުގައި ރޯވި އަލިފާން ނިއްވާލާފައިވަނީ ފުލުހުންނާއި ހިމަންދޫ ކައުންސިލާއި ރަށުގެ އާންމުން ގުޅިގެން ކުރި މަސައްކަތުން މިއަދު ހެނދުނު 6:26 ހާއިރު ކަމަށެވެ.

އެ ހާދިސާ ހިނގި އިރު، ލޯންޗުގައި ކެޕްޓަނާއި ދެ ފަޅުވެރިން އަދި ކުޑަކުއްޖެއް ހުރި ކަމަށާއި ފަޅުވެރިންނަށް ކޮންމެވެސް ވަރަކަށް އަނިޔާވި ނަމަވެސް، ބޮޑު އަނިޔާއެއް ވެފައިނުވާ ކަމަށް ފުލުހުން ބުންޏެވެ.

ފުލުހުން ބުނީ އަލިފާން ރޯވި ލޯންޗު ބޭނުންނުކުރެވޭ ވަރަށް އަނދާފައިވާ ކަމަށާއި މިހާރު އެ ލޯންޗު ފަޅުތެރެއަށް އަޑިއަށް ގޮސްފައިވާ ކަމަށެވެ.

އެ ލޯންޗުގައި އަލިފާން ރޯވާން މެދުވެރިވި ސަބަބެއް އަދި ހޯދިފައި ނުވާ އިރު، ފުލުހުން ދަނީ އެ މައްސަލަ ތަހުގީގުކުރަމުންނެވެ.