ގ. ހިޔާ ރޯދީގައި އަލިފާން ރޯކޮށްލި ކަމުގެ ތުހުމަތުގައި ހައްޔަރުކުރި މީހާ، އިތުރު 30 ދުވަހަށް ބަންދުގައި ބަހައްޓަން ކްރިމިނަލް ކޯޓުން އަމުރުކޮށްފިއެވެ.

ފަޅަށް އޮތް ގ. ހިޔާ ރޯދީގައި މިދިޔަ ހަފުތާގައި އަލިފާން ރޯކޮށްލުމުގެ ތުހުމަތުގައި ހައްޔަރުކޮށްފައި ވަނީ، ލ. މާބައިދޫ، ސަބުނަމްހައުސް، ހުސައިން ޝަހްބާން، 29އ، އެވެ. އެގޭގައި ރޯވުމުގެ ކުޑައިރުކޮޅެއް ކުރިން, އެ ގެއަށް އޭނާ ވަންނަ މަންޒަރު ސީސީޓީވީ ފްޓޭޖުން ފެނެއެވެ. އެގެއަށް ވަނުމަށްފަހު ކުޑަވަގުތުކޮޅެއްގެ ތެރޭގައި އެގެއިން އޭނާ ނުކުމެއެވެ. އެއަށްފަހު ކުއްލިއަކަށް އަލިފާން ރޯވާ މަންޒަރު ފެނެއެވެ.

އެ މީހާ ހައްޔަރުކޮށް ކޯޓަށް ހާޒިރުކުރުމުން އޭނާގެ ބަންދަށް ފުރަތަމަ ޖެހީ ފަސް ދުވަހެވެ. އެ މުއްދަތު ހަމަ ވެގެން، އިއްޔެ އަލުން ކޯޓަށް ހާޒިރު ކުރުމުން ބަންދު މުއްދަތު 30 ދުވަހަށް ވަނީ އިތުރުކޮށްފައެވެ.

އެ އަލިފާނުގެ ހާދިސާގައި އެއްވެސް މީހަކަށް ގެއްލުމެއް ނުލިބެއެވެ.