ވެލާނާ އިންޓަނޭޝަނަލް އެއާޕޯޓް (ވީއައިއޭ) އިން ސިނގިރޭޓު ކާޓަން ބޭރުކުރަން އުޅުނު އިތުރު މައްސަލައެއްގައި ސިފައިންގެ މީހަކު ހައްޔަރުކޮށްފިއެވެ.

ފުލުހުން މިއަދު ބުނީ މިމަހުގެ 21 ވަނަ ދުވަހުގެ 15:55 ހާއިރު ވީއައިއޭގެ ޑިއުޓީ ފްރީ އިން ގަވާއިދާހިލާފަށް ސިނގިރޭޓް ބޭރުކޮށްފައިވާ މައްސަލައިގެ ތުހުމަތުގައި ކޯޓު އަމުރެއްގެ ދަށުން އިއްޔެގެ ވަގުތެއްގައި މީހަކު ހައްޔަރުކޮށްފައިވާ ކަމަށެވެ.

ފުލުހުން ހައްޔަރުކޮށްފައިވަނީ ނ. ވެލިދޫ، ގަސްކަރަ، މުހައްމަދު އައިހަމް (23އ) އެވެ. އޭނާ ބަންދަށް ކޯޓުން ވަނީ ދިހަ ދުވަސް ޖަހައިދީފައެވެ.

އެނގިފައިވާ ގޮތުގައި އައިހަމްއަކީ އެމްއެންޑީއެފްގައި މަސައްކަތްކުރާ މީހެކެވެ.

އެއާޕޯޓުން ސިނގިރޭޓް ކާޓަންތަކެއް ބޭރުކުރި އެހެން މައްސަލައަކާ ގުޅިގެން ފުލުހުން ވަނީ ފުލުހަކު ހިމެނޭ ގޮތަށް މިދިޔަ އަންގާރަ ދުވަހު ދެ މީހަކު ހައްޔަރުކޮށްފައެވެ.

އެ މައްސަލައިގައި ހައްޔަރުކުރީ މ. ސިލްވަނެސްޓް، އަހުމަދު އަފްޒަލް، (45އ) އަދި ދަފްތަރު ނަމްބަރު ރސ. 14358، ޔޫސުފް ނަޒީރު (38އ) އެވެ. އޭގެ ތެރެއިން ނަޒީރަކީ އެއާޕޯޓުގައި ޑިއުޓީ ކުރާ ފުލުހެކެވެ. އޭނާ ވަނީ މުސާރަ ނުލިބޭގޮތަށް ސަސްޕެންޑުކޮށްފައެވެ.

އެ ދެ މީހުންގެ ބަންދުގެ މުއްދަތު ޖެހުމަށް ކޯޓަށް ހާޒިރުކުރުމުން ޝަރުތުތަކަކާއެކު ވަނީ ދޫކޮށްލައިފައެވެ.