ތެލަސީމިއާ ސެންޓަރު، މޯލްޑިވިއަން ބްލަޑް ސާވިސަސް (އެމްބީއެސް)ގެ އިސް ދެ ބޭފުޅަކު މަގާމުން ވަކިކޮށްފިއެވެ.
މަގާމުން ވަކިކޮށްފައިވަނީ ތެލަސީމިއާ ސެންޓަރުގެ ޑިރެެކްޓަރުގެ މަގާމުގައި ހުންނެވި އަހުސަން ހުސައިނާއި އެ ސެންޓަރުގެ ޕަބްލިކް ހެލްތު ކޯޑިނޭޓަރުގެ މަގާމުގައި ހުންނެވި ފައިސަލް އިބްރާހީމެވެ. އެ ދެ ބޭފުޅުން މަގާމުން ވަކިކުރީ އިއްޔެގެ ވަގުތެއްގައެވެ.
ތެލަސީމިއާ ސެންޓަރުން ދޭ ހިދުމަތްތަކާ މެދު ހިތްހަމަނުޖެހި، ލޭ އަޅާ މީހުންނާއި ކުދިންގެ ބެލެނިވެރިން އެ ސެންޓަރު ދޮށުގައި މިދިޔަ ހޮނިހިރު ދުވަހުގެ ރޭ އިހުތިޖާޖުކުރުމާ ގުޅިގެން އެ ސެންޓަރަށް ރައީސް ޑރ. މުހައްމަދު މުއިއްޒު މިދިޔަ އާދީއްތަ ދުވަހު ވަޑައިގެން ވަރުގަދަ ފިޔަވަޅުތަކެއް އެޅުއްވުމަށް ވަނީ އަންގަވައިފައެވެ.
ރައީސްގެ އެންގެވުމާ ގުޅިގެން ތެލަސީމިއާ ސެންޓަރަށް ވަނީ ޑިރެކްޓާ ޖެނެރަލަކު އައްޔަންކޮށްފައެވެ. އަށް އަހަރު ފަހުން އެ ސެންޓަރުގެ ޑިރެކްޓާ ޖެނެރަލްގެ މަގާމަށް އިއްޔެ އައްޔަންކުރީ އަހުމަދު މައުސޫމެވެ.
މައުސޫމް އަކީ މެނޭޖްމަންޓް ދާއިރާގައި އަދި ހިންގުމުގެ ތަޖުރިބާ ހުންނެވި ބޭފުޅެކެވެ. މީގެ ކުރިން މައުސޫމް ވަނީ އައިޖީއެމްއެޗްގައި ވެސް މަސައްކަތް ކުރައްވައިފައެވެ.
ހެލްތު މިނިސްޓްރީން ބުނީ ތެލަސީމިއާ ސެންޓަރަށް ޑެޕިއުޓީ ޑިރެކްޓާ ޖެނެރަލްއަކާއި ޑިރެކްޓަރެއްގެ މަގާމަށް ވެސް ދެ ބޭފުޅުން ވަރަށް އަވަހަށް ހަމަޖެހިގެންދާނެ ކަމަށާއި ވަރަށް އަވަހަށް ފިޒީޝަނެއް ވެސް ހަމަޖެހިގެންދާނެ ކަމަށެވެ.
އޭގެ އިތުރުން އެތަނަށް ތެލަސީމިއާ ސެންޓަރަށް ބޭނުންވާ ފަސް ނަރުހުން ހޯދުމަށްވެސް މިއަދު ވަނީ އިއުލާންކޮށްފައެވެ. އަދި އެހެނިހެން އިދާރީ މުވައްޒަފުންވެސް ހަމަޖެއްސުމުގެ މަސައްކަތް ވެސް ކުރަމުން އަންނަ ކަމަށް މިނިސްޓްރީން ބުންޏެވެ.
