ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ މިއަހަރުގެ ޙައްޖު ދަތުރާ ގުޅޭގޮތުން އުފާވެރި ޚަބަރެއް ހާމަކުރައްވާފައެވެ. އެމަނިކުފާނުގެ ބަސްފުޅުގައި، 2025 ވަނަ އަހަރަށް ޙައްޖު ކޯޕަރޭޝަނުގެ ކިއުގައި ތިބި އެންމެހައި ފަރާތްތަކަށް މިއަހަރު ޙައްޖުގެ މަތިވެރި އަޅުކަން އަދާކުރުމުގެ ފުރުޞަތު ލިބިގެންދާނެ ކަމަށް ވިދާޅުވިއެވެ. މިއީ ގިނަ ޒަމާންތަކަކަށްފަހު، އެއަހަރަކަށް ކަނޑައެޅިފައިވާ ކިއުގައި ތިބި އެންމެހައި ފަރާތްތަކަށް އެއަހަރެއްގައި ޙައްޖަށް ދެވޭ ފުރަތަމަ ފަހަރުކަން ރައީސުލްޖުމްހޫރިއްޔާ ފާހަގަކުރެއްވިއެވެ.
2025 ގައި ހައްޖަށް ދެވޭނެ ކަމަށް ކޯޕަރޭޝަންގެ ކިއުގައި ތިބި އެންމެހައި ފަރާތްތަކަށް މިއަހަރު ހައްޖަށް ދެވޭނެ. އިންޝާ ﷲ. އަދި މިއީ ޒަމާންތަކަކަށް ފަހު, އެއަހަރެއްގައި ކިއުގައި ޖެހިފައިތިބި އެންމެނަށް އެއަހަރު ހައްޖަށް ދެވޭ ފުރަތަމަ ފަހަރުކަން ފާހަގަކުރަން.
— Dr Mohamed Muizzu (@MMuizzu) March 23, 2025
މީގެއިތުރުން، ޙައްޖުގެ އަޅުކަން އަދާނުކޮށް ތިބި ފަރާތްތަކަށް އިސްކަންދިނުމަށްޓަކައި، ރާއްޖެއިން ޙައްޖަށް މީހުން ގެންދިއުމާބެހޭ އުސޫލަށް ބަދަލުގެނައުމަށް ރައީސުލްޖުމްހޫރިއްޔާ ވަނީ ނިންމަވާފައެވެ. މި ނިންމެވުމާ އެއްގޮތަށް، އުސޫލަށް އިސްލާޙު ގެނެސް، މިމަހުގެ 18 ވަނަ ދުވަހު ވަނީ އާންމުކޮށްފައެވެ.
އިސްލާޙު ކުރެވުނު އުސޫލުގެ ދަށުން، ޙައްޖުގެ އަޅުކަން އަލަށް އަދާކުރަން އެދޭ ފަރާތްތަކަށް އިސްކަންދިނުމަށް ވަނީ ނިންމާފައެވެ. އަދި ޙައްޖުގެ އަޅުކަން އަދާކޮށްފައިނުވާ 65 އަހަރުން މަތީގެ ފަރާތްތަކަށް ކޮންމެ އަހަރަކު ވަކި އިންސައްތައެއް ކަނޑައެޅުމަށް ޙައްޖު ކޯޕަރޭޝަނަށް ލާޒިމުކޮށްފައިވެއެވެ.
މި ބަދަލުތަކާއެކު، ޙައްޖުގެ އަޅުކަން އަދާކުރުމުގެ ފުރުޞަތު ލިބުމުގައި އިތުރު ހަމަހަމަކަމެއް ގެނެސްދޭނެކަމަށް އުންމީދުކުރެވެއެވެ. އަދި ޙައްޖު ކިއު ކުޑަކުރުމަށް މި ބަދަލުތަކުން އެހީތެރިވެދޭނެކަމަށްވެސް ބެލެވެއެވެ.
ކިޔުންތެރިންގެ ހިޔާލު