ފިޔާގެ އިތުރުން، އެސްޓީއޯއިން ދަނީ ކާށި އަދި ލުނބޯވެސް ހެޔޮ އަގުގައި ވިއްކަމުންނެވެ. މިއީ ރަމަޟާން މަހު އާންމުކޮށް ބޭނުންކުރާ ބާވަތްތަކުގެ އަގުތައް މަތިނުވެ، އެއްވަރެއްގައި ހިފެހެއްޓުމަށް އެސްޓީއޯއިން ކުރަމުންދާ މަސައްކަތުގެ ބައެކެވެ.
އެސްޓީއޯއިން މަޢުލޫމާތު ދެއްވާފައިވާ ގޮތުގައި، މިއަހަރުގެ ރަމަޟާން މަހަށް ބޭނުންވާ މުދާ ފަސޭހަކަމާއެކު ލިބޭނެ ގޮތް ހަމަޖެއްސުމަށް، ކުރީ އަހަރުތަކެކޭ އެއްފަދައިން މިފަހަރުވެސް ތައްޔާރުވެފައިވެއެވެ. އަދި މީގެ ކުރިން ލިބިފައިވާ ތަޖުރިބާތަކުގެ އަލީގައި، މިއަހަރު ޚާއްޞަ ސަމާލުކަމެއް ދީގެން އާންމު ފަރުދުންނާއި ވިޔަފާރިވެރިންނަށް ފަހި ގޮތްތަކެއް ހޯދައިދިނުމަށް ރާވާފައިވާކަމަށް އެސްޓީއޯއިން ވިދާޅުވެފައިވެއެވެ.
އެސްޓީއޯއިން ފިޔާ ވިއްކާ އަގުތައް:
• ފިޔާ ކިލޯއެއް – 16 ރުފިޔާ
• ފިޔާ ބަސްތާއެއް – 350 ރުފިޔާ
• 10 ބަސްތާ ފިޔާ – 340 ރުފިޔާ
މީގެ އިތުރުން، އެސްޓީއޯއިން ވަނީ ރަމަޟާން މަހަށް ޚާއްޞަކޮށްގެން ހަތަރު ކެޓަގަރީއަކަށް ބަހާލައިގެން ކާބޯތަކެތި އެތެރެކުރުމަށް ތައްޔާރުވެފައެވެ. މީގެ ތެރޭގައި އަސާސީ ކާބޯތަކެތީގެ ގޮތުގައި ފިޔާ، ބިސް، އަލުވި، ކާށި އަދި ކަދުރު ހިމެނެއެވެ. އަދި މީގެ އިތުރުން ތާޒާ ތަރުކާރީއާއި މޭވާ، ތައްޔާރީ ކާނާ އަދި ކެއްކުމަށް ބޭނުންކުރާ ތަކެތިވެސް އެތެރެކުރުމަށް ހަމަޖެހިފައިވާކަމަށް އެސްޓީއޯއިން މަޢުލޫމާތު ދެއްވާފައިވެއެވެ.
ކިޔުންތެރިންގެ ހިޔާލު