މޯލްޑިވިއަންގެ ފުރަތަމަ ވައިޑް-ބޮޑީ އެއާކްރާފްޓް، އޭ330 މަތިންދާބޯޓުގެ ފުރަތަމަ ދަތުރު މި މަހުގެ 22 ގައި ބާއްވާނެ ކަމަށް އެ ކުންފުނިން ބުނެފި އެވެ.

މޯލްޑިވިއަން ހިންގާ އައިލެންޑް އޭވިއޭޝަންގެ މެނޭޖިން ޑިރެކްޓަރު އިބްރާހިމް އިޔާސް ވިދާޅުވީ، ޝެޑިއުލް ދަތުރުތަކުގެ ޓިކެޓް ވިއްކަން ވަރަށް އަވަހަށް ހުޅުވާލާނެ ކަމަށެވެ. އެންމެ ފުރަތަމަ ދަތުރު ކުރަނީ ޗައިނާގެ ޗެންގްޑޫ ސިޓީއަށެވެ. ޗެންގްޑޫގެ އިތުރުން ބެއިޖިން އާއި ޝަންހާއީ އަށް ދަތުރުތައް ކުރަން ރާވާފައިވެ އެވެ. މޯލްޑިވިއަން އިން މީގެ ކުރިން ބުނެފައި ވަނީ، އެ އެއާލައިންގެ އެންމެ ބޮޑު ބޯޓު ދަތުރުކުރާ ޗައިނާގެ ސިޓީތައް ކަނޑައެޅީ، ރާއްޖެ އަށް އެންމެ ގިނަ ޓޫރިސްޓުން އަންނަ މަންޒިލްތައް ބަލައިގެން ކަމަށެވެ.

މޯލްޑިވިއަންގެ އާ މަތިންދާބޯޓު ރާއްޖެ އަށް ގެނެސްފައިވަނީ މިދިޔަ ހޯމަ ދުވަހު އެވެ. އެއާބަސް އޭ330 ބޯޓުން 260 މީހުންގެ އުފުލޭނެ އެވެ. ބިޒްނަސް، ޕްރިމިއަމް އިކޮނޮމީ އަދި އިކޮނޮމީ ކްލާސް ވެސް ހާއްސަ ކޮށްފައިވާ އެ ބޯޓުން ދުރުރާސްތާ ދަތުރުތައް ކުރެވޭނެ އެވެ. ކާގޯ އުފުލޭ ކެޕޭސިޓީއަކީ 10 ޓަނެވެ.

އެއާބަސް އޭ330 ބޯޓާ އެކު އެ އެއާލައިންގެ ފްލީޓުގެ އަދަދު 25 އަށް އިތުރުވާނެ އެވެ. އެއާލައިނުން އަންނަނީ މިހާރު 29 މަންޒިލަކަށް ދަތުރުތައް ކުރަމުންނެވެ. މިދިޔަ އަހަރުގެ ތެރޭގައި އެ އެއާލައިނުން ވަނީ 50،000 ފްލައިޓް އޮޕަރޭޓްކޮށް، އެއް މިލިއަން ފަސިންޖަރުން އުފުލައިފަ އެވެ. އެއާބަސް އޭ330 ބޯޓުގެ ދަތުރުތަށް ސީދާ އެކިމަންޒިލްތަކުން ފެށުމާއިއެކު ފަތުރުވެރިކަމަށް ހެޔޮބަދަލުތަކެއް އަންނާނެއެވެ.