ރާއްޖެއަށް ކުރަމުންދާ ވިއްސާރާގައި ފާއިތުވި 24 ގަޑިއިރު އެންމެ ގިނައިން ވާރޭވެހުނު ކަމަށް ރިކޯޑް ކުރެވުނީ އައްޑޫ ސިޓީގެ ހިތަދޫއަށް ކަމަށާއި އެ ރަށަށް 110 މިލިމީޓަރުގެ ވާރޭވެހުނު ކަމަށް މޫސުމާ ބެހޭ ގައުމީ އިދާރާ (މެޓް) އޮފީހުން ބުނެފި އެވެ.
މެޓުން ބުނީ ރާއްޖެ ސަރަހައްދުގައި ހުޅަނގު މޫސުން ނިމި، އިރުވައި މޫސުން ފެށޭ ދުވަސް ވަރާ ދިމާކޮށް އުފެދިފައިވާ ލޯ ލެވެލް ސާކިއުލޭޝަންއަކާ ގުޅިގެން ކުރަމުންދާ ވިއްސާރާގައި ފާއިތުވި 24 ގަޑިއިރުގެ ތެރޭގައި ރާއްޖޭގެ ބޮޑު ބަޔަކަށް ވިއްސާރަކޮށް، ބައެއް ރަށްތަކަށް ވަރަށް ބޯކޮށް ވާރޭވެހުނު ކަމަށެވެ.
އެންމެ ގިނައިން ވާރޭ ވެހިގެން ރިކޯޑްކުރީ ހިތަދޫއަށެވެ. އެރަށަށް 110 މިލިމީޓަރުގެ ވާރޭ ވެހުނުއިރު، ދެވަނައަށް އެންމެ ގިނައިން ވާރޭވެހުނު ކަމަށް ރިކޯޑްކުރެވުނީ އައްޑޫ ސިޓީގެ ގަމަށެވެ. އެ ރަށަށް 106.5 މިލިމީޓަރުގެ ވާރޭ ވެހުނުއިރު ތިން ވަނައަށް އެންމެ ގިނައިން ވާރޭވެހުނު އއ. ތޮއްޑޫއަށް 103.3 މިލިމީޓަރުގެ ވާރޭވެހުނެވެ.
އައްޑޫގެ ބައެއް ރަށްތަކުގައި ފެން ބޮޑުވެގެން އެމްއެންޑީއެފުން ވަނީ ޕަމްޕު ޖަހައިގެން ފެން ހިންދަން ވެސް ނިކުމެފަ އެވެ.
ކުރިއަށް އޮތް ތިން ދުވަހު ވެސް ރާއްޖެ ސަރަހައްދަށް މޫސުން ގޯސްވާނެ ކަމަށް މެޓުން ބުންޏެވެ.
އެހެންވެ މޫސުމަށް ސަމާލުވުމަށް ވެސް އެ އިދާރާއިން އިލްތިމާސްކުރެ އެވެ.
ކިޔުންތެރިންގެ ހިޔާލު