މިއަހަރު ބޭއްވުމަށް ހަމަޖެހިފައިވާ “މޯލްޑިވްސް މެރިޓައިމް ކޮންފަރެންސް” ގެ އިތުރު ކޮންފަރެންސް ޕާޓްނަރުންނާއެކު މޯލްޑިވްސް ޕޯޓްސް ލިމިޓަޑް (އެމްޕީއެލް) އިން މިއަދު އެއްބަސްވުމެއްގައި ސޮއިކޮށްފިއެވެ.

އެމްޕީއެލްގެ ހެޑް އޮފީހުގައި މިއަދު މެންދުރު ބޭއްވި ރަސްމިއްޔާތެއްގައި “މޯލްޑިވްސް މެރިޓައިމް ކޮންފަރެންސް”ގެ ހަތަރު ޕާޓްނަރުންނާއެކު ވަނީ އެއްބަސްވުމުގައި ސޮއިކޮށްފައެވެ. އެއީ؛

• ލޮޖިސްޓިކްސް ޕާޓްނަރު – މޯލްޑިވްސް ސްޓޭޓް ޝިޕިން (އެމްއެސްއެސް)
• ބްރޯޑްކާސްޓިން ޕާޓްނަރު – ޕަބްލިކް ސާވިސް މީޑިއާ (ޕީއެސްއެމް)
• ހޯސްޓިން ޕާޓްނަރު – ވިލާ ޝިޕިން އެންޑް ޓްރޭޑިން ކޮމްޕެނީ
• މެގަޒިން ޕާޓްނަރު – މޯލްޑިވްސް މެރިޓައިމް ޖާނަލް (އެމްއެމްޖޭ)

އެ ރަސްމިއްޔާތުގައި އެމްޕީއެލްގެ ފަރާތުން ސޮއިކުރެއްވީ އެ ކުންފުނީގެ ސީއީއޯ މުހައްމަދު ރިޝްވާނެވެ. ލޮޖިސްޓިކްސް ޕާޓްނަރު އެމްއެސްއެސްގެ ފަރާތުން މެނޭޖިން ޑިރެކްޓަރު އަހުމަދު ޝަރީފު ސޮއިކުރެއްވި އިރު، ބްރޯޑްކާސްޓިންގ ޕާޓްނަރު ޕީއެސްއެމްގެ ފަރާތުން އެއްބަސްވުމުގައި ސޮއިކުރެއްވީ މެނޭޖިން ޑިރެކްޓަރު އަހުމަދު ޝަކީބެވެ.

ހޯސްޓިން ޕާޓްނަރު ވިލާ ޝިޕިން އެންޑް ޓްރޭޑިންގެ ފަރާތުން ޗީފް އޮޕަރޭޝަނަލް އޮފިސަރު މުއާވިޔަތު އުމަރު ސޮއިކުރެއްވި އިރު، މެގަޒިން ޕާޓްނަރު އެމްއެމްޖޭގެ ފަރާތުން ސޮއިކުރެއްވީ ކެޕްޓަން މުހައްމަދު ނާޒިމެވެ.

“މޯލްޑިވްސް މެރިޓައިމް ކޮންފަރެންސް” ބޭއްވުމަށް ހަމަޖެހިފައިވަނީ އަންނަ އޭޕްރީލް މަހުގެ 15 ވަނަ ދުވަހުއެވެ. މިއީ “މޯލްޑިވްސް މެރިޓައިމް ކޮންފަރެންސް”ގެ ދެވަނަ އެޑިޝަނެވެ. އެ ކޮންފަރެންސް އެންމެ ފުރަތަމަ އެމްޕީއެލުން ބޭއްވީ 2024 ވަަނަ އަހަރެވެ.

އެމްޕީއެލުން ބުނީ އެ ކޮންފަރެންސަކީ މެރިޓައިމް ދާއިރާގެ ބައިނަލްއަގުވާމީ ތަޖުރިބާކާރުންނާއި ސްޓޭކްހޯލްޑަރުންނާއި ދާއިރާއާ ގުޅުންހުރި ފަރާތްތައް ބައްދަލުކޮށް، ދާއިރާގެ ކުރިއެރުމާ ގުޅޭގޮތުން މަޝްވަރާކޮށް ހިޔާލު ބަދަލުކުރުމުގެ ގޮތުން ބާއްވާ ބައިނަލްއަގުވާމީ ކޮންފަރެންސެއް ކަމަށެވެ.

އޭގެ އިތުރުން އެ ކޮންފަރެންސްގެ ޕާޓްނަރުންގެ ގޮތުގައި މޯލްޑިވްސް ކޯސްޓް ގާޑް، ޓްރާންސްޕޯޓް އެންޑް ސިވިލް އޭވިއޭޝަން މިނިސްޓްރީ، ޔުނައިޓަޑް ނޭޝަންސް ކޮންފަރެންސް އޮން ޓްރޭޑް އެންޑް ޑިވަލޮޕްމަންޓް (އަންކްޓަޑް)، އިންޓަނޭޝަނަލް އެސޯސިއޭޝަން އޮފް ޕޯޓްސް އެންޑް ހާބަސް، ސެކިއުރިޓީ އެންޑް ސޭފްޓީ ޕާޓްނަރުގެ ގޮތުގައި މޯލްޑިވްސް ޕޮލިސް ސާވިސަސް އަދި އެކެޑަމިކް ޕާޓްނަރުގެ ގޮތުގައި މޯލްޑިވްސް ނޭޝަނަލް ޔުނިވާރސިޓީ ވަނީ މީގެ ކުރިން ހަމަޖައްސައިފައެވެ.