ނޭޕާލްގައި ކުރިއަށް ދިޔަ ބޮޑު މުޒާހަރާތަކާ ގުޅިގެން ބޮޑުވަޒީރު ކޭޕީ ޝަރުމާ އޮލީ އިސްތިއުފާ ދެއްވުމަށްފަހު، އެ ގައުމުގެ ވަގުތީ ސަރުކާރުގެ ބޮޑުވަޒީރު ކަމަށް ސުޝިލާ ކާކީ އައްޔަންކުރައްވައިފިއެވެ. މިއީ ނޭޕާލްގެ ތާރީޚުގައި އަންހެން ބޮޑުވަޒީރެއް އައްޔަންކުރެވުނު ފުރަތަމަ ފަހަރެވެ.
ނޭޕާލްގެ ކުރީގެ އުއްތަމަ ފަނޑިޔާރު ކަމުގައިވާ ސުޝިލާ ކާކީ މި މަގާމަށް އައްޔަންކުރެއްވީ ރައީސް ރާމް ޗަންދްރާ ޕައުޑެލް އެވެ. މި ނިންމުން ނިންމެވީ އެގައުމުގެ އަސްކަރިއްޔާގެ އިސްވެރިޔާ އަޝޮކް ރާޖް ސިގްޑެލް އާއި މުޒާހަރާތައް ރޭވުމުގައި އިސްކޮށް ހަރަކާތްތެރިވި ޒުވާނުންނާ ކުރެވުނު މަޝްވަރާތަކަށް ފަހުގައެވެ.
ނޭޕާލްގެ އެކި ސިޓީތަކުގައި ފެތުރުނު މުޒާހަރާތަކުގެ މައިގަނޑު ސަބަބަކީ ސަރުކާރުގެ ކޮރަޕްޝަންގެ އަމަލުތަކާއި ސޯޝަލް މީޑިއާ ފްލެޓްފޯމުތައް ބްލޮކް ކުރުމާ ދެކޮޅަށް ރައްޔިތުން، ޚާއްސަކޮށް ޒުވާނުން ނުކުތުމެވެ. މި މުޒާހަރާތައް ވަރަށް ބޮޑަށް ހޫނުވެ، ބައެއް މުޒާހަރާކުރާ މީހުން ގާނޫނު ހަދާ މަޖިލީހާއި ސިޔާސީ ލީޑަރުންގެ ގެތަކާއި ބައެއް ހޮޓެލްތަކުގައި ހުޅުޖެހުމުގެ އަމަލުތައް ހިންގައިފިއެވެ.
މި ހާދިސާތަކުގައި ޖުމްލަ 19 މީހަކު މަރުވެފައިވާ ކަމަށް ރިޕޯޓްތައް ބުނެއެވެ. މިހާރު ނޭޕާލްގެ ސިފައިން ގައުމުގައި އަމަންއަމާންކަން ގާއިމުކުރުމަށް ޚާއްސަ ފިޔަވަޅުތަކެއް އަޅަމުން ގެންދާ ކަމަށް މަޢުލޫމާތު ލިބެއެވެ.
ސުޝިލާ ކާކީގެ އައްޔަންކުރުމަކީ ނޭޕާލްގެ ސިޔާސީ ތާރީޚުގައި މުހިންމު ހިސާބަކަށް ވެގެންދާނެ ކަމެއް ކަމުގައި ބައިނަލްއަގްވާމީ ވިސްނުންތެރިން ބުނެއެވެ. އަދި މި ބަދަލާއެކު ގައުމުގައި އަމަންއަމާންކަން އަލުން ގާއިމުވެ، ރައްޔިތުންގެ އެދުންތައް ހާސިލުކުރުމަށް މަސައްކަތް ކުރެވޭނެ ކަމުގެ އުންމީދު ކުރެވެއެވެ.
ކިޔުންތެރިންގެ ހިޔާލު